Самарқанддаги заправкада юз берган портлаш қурбонлари сони 3 кишига етди. Бу ҳақда “Севимли” телеканлининг “Замон” информацион дастурида маълум қилинди.
Самарқанд вилоятининг Каттақўрғон тумани, “Қўштепа” МФЙда жойлашган автомобилларга ёқилғи қуйиш шохобчасида портлаш ва ёнғин 7 май куни содир бўлганди. Ҳодиса АЁҚШнинг ҳовлисида “ЗИЛ” автомашинасига ёқилғи қуйиш вақтида юз берган. Оқибатда 2 нафар фуқаро ҳалок бўлган, яна бир киши тан жароҳати билан тиббиёт бирлашмасига ётқизилганди.
“Замон” информацион дастурида хабар қилинишича, шифохонага ётқизилган шахс 9 май куни вафот этган. Вафот этган уч киши шахобча раҳбари, оператор ва “ЗИЛ” ҳайдовчиси бўлган.
Самарқанд вилояти ИИБ матбуот котиби Ҳамидулло Сагдуллаевнинг маълум қилишича, ҳолат юзасидан Жиноят кодексининг 259-моддаси (ёнғин хавфсизлиги қоидаларини бузиш) иккинчи қисми билан жиноят иши қўзғатилган бўлиб, дастлабки тергов ҳаракатлари олиб борилмоқда.
2025 йилнинг март ойида Қашқадарё вилояти Касби туманидаги ёнилғи қуйиш шохобчасида иккита цистерна ёниб кетганди. Бунинг оқибатида икки киши куйиш жароҳатини олганди.
Изоҳ (0)