Қорабоғда Хонканди—Аскеран автомобиль йўли яқинидаги газ қуйиш шохобчасида содир бўлган портлаш оқибатида сўнгги маълумотларга кўра, 20 киши ҳалок бўлди, деб ёзмоқда “Интерфакс” тан олинмаган республика соғлиқни сақлаш вазирлигига таяниб.
290 нафар ярадор тиббий муассасаларга етказилди, дейилади ССВ баёнотида, унга кўра, “ўнлаб одамларнинг аҳволи ўта оғир”.
Тан олинмаган Қорабоғ ССВ “ёниб кетганлар ҳақида маълумотлар етишмаётгани”, улар бедарак йўқолганлар рўйхатида эканини маълум қилди. Бундай одамлар қанча экани номаълум.
“Тоғли Қорабоғнинг тиббий имкониятлари ҳаётни сақлаб қолиш учун етарли эмас, зудлик билан тез тиббий ёрдамдан фойдаланиш зарур”, — деб ёзди Қорабоғдаги инсон ҳуқуқлари бўйича омбудсман Гегам Степанян 25-сентябр куни кечқурун.
Озарбайжон марказий ҳокимияти Хонкандидаги портлаш қурбонларини даволаш учун тиббий ёрдам юборди.
“2023 йилнинг 25-сентябр куни Хонканди шаҳри яқинидаги ёнилғи қуйиш шохобчасида портлаш содир бўлди. Маълумотларга кўра, ҳодиса оқибатида кўплаб қурбонлар ва жароҳатланганлар бор. Шу муносабат билан жабрланганларга ёрдам кўрсатиш мақсадида 200 кишини даволаш учун куйишга қарши тиббий буюмлар, боғламлар, қўлқоплар, дори-дармонлар (спрейлар, кремлар, оғриқ қолдирувчи воситалар, антибиотиклар ва бошқалар) бўлган тез тиббий ёрдам машинаси юборилди”, — дейилади Озарбайжон президенти маъмурияти хабарида.
Ўз навбатида Арманистон Соғлиқни сақлаш вазирлиги зарур тиббий асбоб-ускуналар ва дори-дармонларга эга шифокорлар гуруҳи портлашда яраланганларга ёрдам кўрсатиш учун Хонкандига вертолётда учиб кетганини маълум қилди.
Россия тинчликпарвар контингенти шифокорлари ҳам жабрланганларга ёрдам кўрсатмоқда, деб ёзди “Интерфакс” тинчликпарвар кучларнинг норасмий Telegram-каналига таяниб.
Тоғли Қорабоғдаги Хонканди —Аскеран трассаси яқинидаги “заправка”да 25-сентябр куни кечқурун портлаш содир бўлди.
Тан олинмаган республика парламенти депутати Метаксе Акопян портлаш содир бўлган газ омбори Арманистонга кетаётган одамларни ёнилғи билан таъминлаганини айтди.
Изоҳ (0)