3 май куни Леди Гага Бразилияда ўзининг фаолиятидаги энг катта шоуни ўтказди.
Поп-юлдуз Рио-де-Жанейродаги Копакабана соҳилида бепул концерт бериб, 2 миллиондан ортиқ томошабин олдида чиқиш қилди.
“Бу оқшом биз тарих яратамиз, мен билан бирга уни яратаётганингиз учун раҳмат”, деди Леди Гага саҳнадан мухлисларга мурожаат қилиб.
Ташкилотчилар шоуга 2,1 миллион киши келганини аниқлашди.
Концерт маҳаллий вақт билан соат 22:10 да бошланди. Баъзи мухлислар эрта тонгдан соҳилга келиб, кун бўйи қуёш остида ўтиришди, баъзилар эса концертни яхшироқ томоша қилиш учун дарахтларга чиқиб жойлашди. Аввалига хонанда 2011 йилда чиққан Bloody Mary қўшиғини куйлади, шунингдек, Poker Face, Alejandro ва янги хит Abracadabra каби машҳур қўшиқларини ижро этди.
“Бугун ҳаётимдаги энг яхши кун, бу ерда бўлиш ажойиб”, деди 27 ёшли томошабинлардан бири Мануэла Добес.
BBC хабарига кўра, Гаганинг концерти маҳаллий иқтисодиётга тахминан 100 миллион доллар даромад келтириши кутилмоқда. Шаҳар ҳокимияти ёз ва қишдаги асосий байрамлардан олдин иқтисодиётни рағбатлантириш учун шундай тадбирларни ўтказади.
Изоҳ (0)