Бирлашган Миллатлар Ташкилотининг судьяси Лидия Мугамбе Буюк Британияда угандалик ёш аёлни эксплуатация қилгани учун олти йилу тўрт ойга озодликдан маҳрум этилди. Бу ҳақда The Guardian газетаси хабар бермоқда.
Шунингдек, суд маҳкумага жабрланувчи билан тўғридан-тўғри ёки билвосита алоқада бўлишни ман этган.
50 ёшли Мугамбега Угандалик аёлни доимий ишидан маҳрум этиб, уни ўзига хизматкор сифатида ишлашга ва болаларига қарашга мажбурлаганлик айби қўйилди. Шу вақт мобайнида Мугамбенинг ўзи Оксфорд университетида ҳуқуқшунослик бўйича докторлик даражасини олаётган эди. У Буюк Британиянинг иммиграция қонунчилигини бузишга кўмаклашганлиги, кимнидир мажбурий меҳнатга тортганлиги ва иш бўйича гувоҳни қўрқитганлиги учун айбдор деб топилди.
“Мугамбе аёлни доимий ишидан маҳрум этиб, уни ўзининг хизматкори бўлиб ишлашга ва болаларига қарашга мажбур қилган”, дея ёзади мақола муаллифлари.
Тергов маълумотларига кўра, Мугамбе ўз қурбонини эксплуатация қилган, аёлнинг меҳнат ҳуқуқларидан бехабарлигидан фойдаланиб, уни Буюк Британияга келиш мақсади ҳақида янглиштириб қўйган. Прокурор Керолайн Хоги таъкидлаганидек, Мугамбе ва унинг қурбони ўртасида “муносабатларда аниқ ва сезиларли кучлар номутаносиблиги” мавжуд бўлган.
Судда прокурор ҳуқуқий сабабларга кўра исми ошкор этилмаётган ёш аёлнинг кўрсатмаларини ҳам ўқиб эшиттирган. Жабрланувчининг айтишича, у ўзи учун хавфсираган ҳолда Угандага қайта олмайди ва онасини бошқа ҳеч қачон кўрмаслиги мумкин. Унга Буюк Британияда бошпана берилган.
Оксфорд қироллик судида Мугамбега ҳукм чиқарган судья бу ишни “жуда ачинарли” деб атаган ва айбланувчининг, жумладан инсон ҳуқуқларини ҳимоя қилишдаги ютуқларини санаб ўтган.
“Мен сизни олти йилу тўрт ойлик қамоқ жазосига ҳукм қиламан”, дейилади судьянинг эълон қилинган баёнотида.
БМТ расмий маълумотларига кўра, Мугамбе 2023 йил май ойида ташкилотнинг судьялар рўйхатига киритилган. Бироқ бу пайтга келиб, унга нисбатан тергов аллақачон бошланган эди.
Гап шундаки, полиция унинг уйига мазкур воқеадан уч ой олдин келган. Бу эса Мугамбенинг тайинлови вақтида ушбу жиноят иши эътиборга олинмагани ёки текширилмай қолиб кетган бўлиши мумкинлигидан далолат қилади.
Изоҳ (0)