Ўзбекистонда судга босим ўтказганлик ҳолати бўйича юритилган жиноят ишлари ҳақида оммада маълумот кам. Бу ҳақда ҳуқуқшунос Саидали Мухторалиев «Дарё» мухбирига берган интервьюсида айтиб ўтди.
Саидали Мухторовнинг айтишича, судлар фаолиятига ноқонуний аралашувлар ҳақида кўп айтилади, лекин унга ҳуқуқий баҳо берилган ҳолатлар ҳақида жамоатчиликка жуда кам маълумот берилади.
«Суд ишларига учинчи шахслар: кўпроқ давлат амалдорлари, турли хил масъул мансабдор шахслар ёки муайян бир кучга эга бўлган бизнес вакилларининг аралашуви ҳақида гапирилади. Лекин буларнинг бирортаси бўйича аниқ фактлар, расмий ишлар юритилгани ёки жиноят иши қўзғатилгани, қонуний чоралар кўрилгани ҳақидаги маълумотларни кўрмаганмиз ва хабарларни эшитмаганмиз», — деди ҳуқуқшунос.
Унинг алоҳида таъкидлашича, судьяларнинг фаолиятига ноқонуний аралашувни тўхтатиш учун жабрдийда судьянинг ўзи фаол бўлиши керак.
«Судьяга мана бу ишни бундай мазмунда ҳал қилишингиз керак, деган мазмунда босим қилса, ўша судья аралашув ҳақида расмий тарзда ҳаракатини бошлаши керак-да. Ҳар қандай аралашувни тўхтатиш учун биринчи навбатда ўша судьянинг ўзи фаол бўлиши керак. Чунки жабрдийда у. Афсуски, амалиётда биз бирор-бир ҳокимни, бирор-бир давлат амалдорини, бирор-бир мансабдорни судьялар фаолиятига ноқонуний аралашганлиги ҳолати бўйича аниқ бир жавобгарликка тортилганлик фактини кўрмадик», — деди Сайдали Мухторов.
Ҳуқуқшуноснинг қўшимча қилишича, мутелик, яъни ноқонуний ҳолатни шунчаки оддий бир ҳаракат сифатида, оддий ҳолат сифатида қабул қилишга ўрганганлик ҳолати суд тизимига нисбатан ишончсизлик ортиб боришига сабаб бўлмоқда.
Мавзуга доир:
- «Ўзбекистон суд тизимини ҳозирча мустақил дея олмаймиз» — БМТ махсус маърузачиси
- «Илгари босим бўлган». Қашқадарё вилоят суди раиси 2016 йилгача судьялар фаолиятига аралашув бўлганини тасдиқлади
- «Ҳамма раҳбарлар қулоғига қуйиб олсин: суд фаолиятига аралашишга ҳеч кимнинг ҳақи йўқ» — Шавкат Мирзиёев инвестор ҳуқуқининг кафолати ҳақида
Изоҳ (0)