90 нафар украиналик судья россиялик ҳарбий хизматчиларнинг ҳарбий жиноятлари ҳақида суд ишлари олиб бориш учун Буюк Британия томонидан ташкиллаштирилган ўқув курсларидан ўтади. Бу ҳақда Sky News хабар бермоқда.
Нашр маълумотларига кўра, украиналик судьяларнинг биринчи гуруҳи ўтган ҳафта «яширин жойда» аллақачон интенсив тренингни тугатган. Яқин ойларда бошқа судьялар ҳам ўқитилади. Sky News қайд этишича, Буюк Британия ҳукумати украиналик судьяларни тайёрлашга жами 2,5 миллион футн стерлинг ажратган.
Украиналик мутахассисларни тайёрлаш жараёнига британиялик судья Ховард Моррисон раҳбарлик қилмоқда, у Халқаро жиноят судида ишлаган, Югославия ва Руанда бўйича Халқаро жиноий трибуналда қатнашган. Хусусан, у Босния серблари собиқ етакчиси Радован Каражич иши бўйича судьялик қилган. Март ойида у Украина собиқ бош прокурори Ирина Венедиктованинг маслаҳатчисига айлангани хабар берилганди.
«Бу, шубҳасиз, жуда муҳим, чунки адолат бўлиши муҳим, лекин яна бир сабаби борки, ҳозир Украинадаги судларни кузатиб бораётган россиялик аскарлар ва офицерлар халқаро ҳуқуққа мувофиқ ҳаракат қилиши кераклигини тушуниб етади, деб умид қиламан», — деди Англия ва Уэльс бош прокурори Виктория Прентис ушбу дастурни изоҳлар экан.
Ҳарбий жиноятлар бўйича суд жараёнларининг катта қисми Украина ҳудудида бўлиб ўтиши кутилмоқда.
Украина ҳукумати Россиянинг ҳарбий жиноятлари бўйича махсус трибунал тузишни талаб қилмоқда. Ноябрь охирида Еврокомиссия раҳбари Урсула фон дер Ляйен Евроиттифоқ бундай ишларни текшириш учун БМТ билан ҳамкорликда махсус суд ташкил қилмоқчи эканини айтди. «Катта еттилик» мамлакатлари етакчилари 12 декабрь кунги саммитдан кейин Россия президентини ва бошқа айбдорларни халқаро ҳуқуққа мувофиқ жавобгарликка тортишга ваъда берди.
Мавзуга доир:
Изоҳ (0)