Эронда ҳижобни нотўғри ўрагани учун полиция томонидан ҳибсга олинган 22 ёшли Маҳса Аминийнинг вафотидан кейин бошланган норозилик намойишлари чоғида мамлакат хавфсизлик кучлари томонидан уч киши ўлдирилди, деб ёзади CNN Норвегиянинг Hengaw Organization for Human Rights инсон ҳуқуқлари устидан назорат ташкилотига таяниб. Шунингдек, 75 киши турли жароҳатлар олган.
БМТнинг Инсон ҳуқуқлари бўйича олий комиссари вазифасини бажарувчи Нада ал-Нашиф баёнот билан чиқиб, Эрон хавфсизлик кучларининг намойишларга зўравонлик билан муносабатда бўлиши юзасидан хавотир билдирди.
Шунингдек, БМТ Инсон ҳуқуқлари бошқармаси маълум қилишича, Эрон ахлоқ полицияси сўнгги ойларда кўчалардаги патрулликни кенгайтириб, ҳижобни нотўғри ўраган аёлларни ҳибсга олмоқда, оғзаки ва жисмоний хўрликларга дучор қилмоқда.
Бу орада Теҳрон губернатори Муҳин Мансурий намойишчиларни полицияга ҳужум қилишда ва жамоат мулкини вайрон қилишда айблади. Намойишчилар «Теҳронда тартибсизликлар юзага келтириш учун тўлиқ уюшган ва тайёргарлик кўрган», деб ёзди у Twitter’да.
Эрон полицияси Маҳса Аминийга ҳибсда сақланаётган пайтда жисмоний зарар етказилганини рад этиб, унинг ўлими «бахтсиз ҳодиса» бўлганини таъкидлади.
Эрон ҳукумати қизнинг жасади ёриб кўрилганини, натижалар тиббий экспертларнинг батафсил текширувидан кейин эълон қилинишини билдирди.
Ижтимоий тармоқларга жойланаётган видеоларга қараганда, 20 сентябрь куни намойишлар Эроннинг 31 та вилоятидан 16 тасини қамраб олди.
Маҳса Аминий Теҳронга ўтган ҳафта келган ва акаси билан бирга метродан чиқаётганида ахлоқ полицияси томонидан ҳибсга олинган. Бунга унинг ҳижобни нотўғри ўрагани сабаб бўлган. 1979 йилги Ислом инқилобидан кейин эронлик аёллар учун ҳижоб тақиш мажбурий бўлиб келмоқда.
Al Jazeera телеканали маълумотларига кўра, Эрон ҳукуматининг қиз юрак хуружидан вафот этгани ҳақидаги баёнотига қарамасдан, у туғилиб-ўсган Секкезе шаҳрида ҳамда Эрон ғарбидаги бошқа шаҳарларда кенг кўламли норозилик намойишлари бошланган. Одамлар маъмурий бинолар атрофида тўпланиб, ҳукуматга қарши шиорларни баралла айтган, баъзи аёллар эса бирдамлик белгиси сифатида ўз рўмолларини ечиб, осмонга отган. Бундан ташқари, ижтимоий тармоқларда қизлар флешмоб уюштириб, ҳижобларини ёқиб юбормоқда ва сочларини кесиб ташламоқда.
Эрон Ислом Республикаси Ҳуқуқ-тартибот кучлари Ибрат патрули («ахлоқ полицияси») — Эрон Ички ишлар вазирлиги назорати остидаги ҳуқуқ-тартибот органи. 2005 йилда алоҳида тузилма сифатида ажралиб чиққан. Ибрат патрули вазифаларига Эрон фуқаролари ва чет элликларнинг жамоат жойларида шариат бўйича муносиб кийиниб юришини таъминлаш киради.
Аёлларнинг бошини ёпмай юриши, рўмол ёки ҳижобни нотўғри тақиши, авратни ёпмайдиган кийим кийиши, баъзи ҳолларда эса «бегона эркак билан яқиндан мулоқот қилиши» уларни ҳибсга олиш учун асос бўлиб ҳисобланади.
Аввалроқ Эрон Маданият ва ислом вазирлиги аёлларнинг рекламаларда суратга тушишини тақиқлаганди, бу Эроннинг Домино компанияси бир аёл бошига рўмол шарф ташлаб, автомобилни бошқариб кетаётгани, сўнг эса шоколадли қиём билан қопланган музқаймоқни егани акс этган роликни чиқарганидан кейин юз берганди.
Изоҳ (0)