Қашқадарё вилояти суди раиси Абдуқаюм Маҳкамов 2016 йилга қадар бўлган муддат давомида судьялар фаолиятига аралашув, уларнинг фикрини ўзгартиришга уриниш ва босим бўлганини тан олди. Бу ҳақда Қарши шаҳридаги Журналистлар уйида бўлиб ўтган матбуот анжуманида маълум қилинди, дея хабар берди «Дарё» мухбири.
Қайд этилишича, Қарши шаҳридаги Журналистлар уйида вилоят суди раиси ва унинг ўринбосарлари иштирокида матбуот анжумани ташкил этилган. Матбуот анжуманида сўз олган «Дарё» мухбири суд раиси ва ўринбосарларига юзланиб, судьялар фаолияти давомида уларнинг қарорларини ўзгартиришга уриниш (хоҳ у илтимос тарзида, хоҳ босим ёки бошқа усулларда) бўлган-бўлмагани билан қизиқди.
«Илгари — 2016 йилгача бўлган. Ўзи суд жараёни манфаатлар тўқнашувидан иборат. 2014-, 2015- ёки 2016 йилларгача бўлган даврни эсланг, бирорта оқлов ҳукмини учратасизми? Йўқ, албатта. Шунинг учун иш давомида бунақа аралашувлар бўлган. Аммо 2016 йилдан сўнг, айнан амалдаги Шавкат Мирзиёевнинг ҳокимият тепасига келиши ва судьялар дахлсизлигини кучайтириш, уларнинг мустақиллигини таъминлашга бўлган эътибор сабаб айни кунда умуман аралашув йўқ», — деди вилоят суди раиси Абдуқаюм Маҳкамов.
Вилоят суди раиси ўринбосарларининг барчаси — жиноят ишлари бўйича судлов ҳайъати раиси Ўткир Мамадалиев, фуқаролик ишлари бўйича судлов ҳайъати раиси Эргаш Умиров, иқтисодий ишлар бўйича судлов ҳайъати раиси Мўмин Остонов ҳамда вилоят Маъмурий суди раиси Холис Муҳаммедовлар фаолияти давомида умуман босим ёки қарорини ўзгартиришга уринишлар бўлмаганини билдирди.
Абдуқаюм Маҳкамов, шунингдек, Ғузор туманининг собиқ ҳокими Саъдулла Бобоқулов ҳамда Ғузор туманлараро суди раиси Саттор Ақанов ўртасидаги тортишувни ҳам эсга олиб, мазкур воқеада ҳам судьяга ҳоким томонидан босим ўтказишга уриниш борлигини эслатди.
«Ўша мулоқотда ҳокимнинг сўзига эътибор берганмисиз? Ўзини таништиришда мен Халқ депутатлари туман кенгаши раисиман, дейди. Ҳолбуки, ҳоким судьянинг ҳар йил якунида кенгашга ҳисобот беришига урғу бериб, ўзини ҳоким сифатида эмас, кенгаш раиси сифатида таништиради. Аммо ўша мулоқотда судьянинг ҳам айби бор. Бу ҳақда мен ўша пайт судья Ақанов билан гаплашиб, ўзига ҳам айтганман. Судья ҳар қандай вазиятда оғир, босиқ ва муомала маданиятига риоя қилиши керак. Суҳбатдошига кечириб қўясиз, дея қўпол муомалада бўлиш судга ярашмайди», — деди Абдуқаюм Маҳкамов.
Эслатиб ўтамиз, Абдуқаюм Маҳкамов аввалроқ «Дарё» мухбирининг журналист ва блогерларнинг очиқ суд мажлисларида қатнашишига судьялар томонидан тўсиқ қўйилаётгани ва бунинг сабаби ҳақидаги саволига «Журналист ва блогерлар судга келганда чақирилган томон манфаатини ҳимоя қилади-да», дея жавоб берганди.
Изоҳ (0)