Яқин келажакда смартфонларда жуда қизиқарли янги функциянинг пайдо бўлиши кутилмоқда — улар бошқа қурилмаларнинг “саломатлигини” таҳлил қилиб, носозликлар ҳақида олдиндан огоҳлантира олади. Бу технологияни Жанубий Кореянинг Samsung компанияси эълон қилди.
Унга кўра, AI Pre-Care Notification деб номланган янги сунъий интеллект асосидаги илова орқали фойдаланувчилар ўз уйидаги маиший техникалар ҳолатини кузатиб боришлари мумкин бўлади. Илова қурилмаларнинг ишлаш шароитлари, юкланиш даражаси ва умумий техник ҳолатини таҳлил қилиб, яқин орадаги эҳтимолий носозлик ҳақида огоҳлантириш юборади.
Ушбу функциянинг, айниқса, катта уй хўжаликлари учун қулайлик яратиши кутилмоқда. Техник носозликни вақтида аниқлаш орқали фойдаланувчилар ортиқча харажатлардан қутулишлари ва техника умрини узайтиришлари мумкин бўлади.
AI Pre-Care Notification дастлаб Samsung’нинг ўзига хос маиший техникалари — музлаткичлар, кондиционерлар, идиш ювиш машиналари, пишириш панеллари, микротўлқинли печлар ва кир ювиш машиналари билан интеграцияланади.
Яқин келажакда бу функция янги авлод Galaxy смартфонларида тўлиқ жорий қилиниши кутилмоқда. Бундан ташқари, Samsung иловани булут технологиялари орқали бошқа тизимларга ҳам улашни режалаштирмоқда.
Мутахассислар фикрича, бу каби функциялар фойдаланувчининг техникадан онгли фойдаланишини рағбатлантиради ва хизмат кўрсатиш тизимининг янада соддалаштирилишига олиб келади.
Изоҳ (0)