Муваффақият ва оламшумул шон-шуҳрат бу шахсларни кўпчиликнинг кумирларига айлантирди. Баъзилар ижодга қўшган ҳиссаси туфайли эътибор қозонган бўлса, бошқалари сиёсий соҳада из қолдирди. Бироқ уларни нафақат машҳурлик, балки даҳшатли касаллик — деменция ҳам бирлаштириб туради.
Шонн Коннери
Айғоқчи Жеймс Бонд ҳақидаги еттита фильмда бош қаҳрамонни ижро этган “агент 007” Шон Коннери бутун умри давомида 80 дан ортиқ фильмларда рол ўйнаган ва 2010 йилда 80 ёшида фаолиятини якунлаган.
У рафиқаси Мишел Рокбрун билан биргаликда Багама оролларига кўчиб ўтишга қарор қилади, у ерда кино юлдузининг аҳволи оғирлашади. Актёр томоқ саратонига қарши курашади, юрагини ҳам даволатади, аммо кейинчалик унга Альцгеймер ташхиси қўйилади – актёр гапириш қобилиятини йўқотиб, содир бўлган воқеаларни хронологик тартибда қайта эслай олмайди.
“Турмуш ўртоғимнинг шахсий ҳаёти барбод бўлди — у ўзини нормал тута олмасди, жисмоний фаоллиги ҳам сезиларли даражада камайди. Аммо эримнинг сўнгги орзуси амалга ошганидан хурсандман — у қийналмай ўлишни орзу қилган. Шундай бўлди ҳам: у уйқусида тинчгина вафот этди. Мен доим унинг ёнида эдим. Ҳаммаси у хоҳлагандек бўлди”
2020 йил 31 октябрда Шон Багама оролларидаги уйда вафот этади, унинг жасади куйдирилиб, кули икки йилдан сўнг Шотландияга сочилади.
Маргарет Тетчер
“Темир хоним” ёки лавозимида энг узоқ — 11 йил (1979 йилдан 1990 йилгача) ўтирган Буюк Британия бош вазири 2002 йилда бир нечта микроинсультларни бошдан кечиради, бу унинг ҳаётини сезиларли даражада бузади.
Соғлиғи сабаб Тетчер карьерасидан кетади, сиёсий масалаларда камроқ қатнаша бошлайди, аммо “вақтинчалик танаффус” ҳам сиёсатчини деменциядан қутқара олмайди — касаллик 2005 йилда ўзини даҳшатли тарзда намоён қилади.
Маргарет нонуштага нима еганини, уй манзилини унута бошлайди, бир хил саволларни уч-тўрт марта бериб, марҳум эрини ҳалиям тирик, деб ўйлай бошлайди.
Сиёсатчининг қизи Керол бу воқеадан ҳайратда қолади — у онасини бу хасталикка ҳеч қачон чалинмаса керак деб ўйларди, чунки унинг хотираси компьютердан кучли эди.
“Бу бирданига чақмоқ ургандек гап эди. Онамнинг ўз хотираси билан курашаётганини кўриб, ўрнимдан йиқилиб тушишимга сал қолди. Мен ишонолмадим. Менга ҳар доим у ҳар қандай касалликка қарши иммунитетга эга ва машаққатли синовлардан ўта оладигандек туюларди”.
Робин Уильямс
Америкалик актёр ва комедиячи қисқа умри давомида юздан ортиқ картиналарда, жумладан, “Жуманжи”, “Адамс”, “Тунги тингловчи”, “Бедорлик”, “Гудзондаги Москва” каби фильмларда суратга тушган.
Уильямс Миннесота штатидаги Ҳазелден реабилитация марказида гиёҳвандлик ва алкоголизмдан даволанган, шунингдек, депрессия билан курашган. Бу ҳақда актёрнинг ўзи хабар бериб, касалликларининг барча турларини санаб ўтади: биполяр бузилиш, маник ва клиник депрессия. Бунинг устига унга Паркинсон касаллиги ташхиси қўйилган.
Қариндошларининг айтишича, актёр нафақат маънавий, балки жисмонан ҳам чарчаган, кейинчалик унинг хотираси ҳам сустлашади — унда деменция белгилари пайдо бўлади. Бу эса Робинга сценарийларни ёдлашга имкон бермаган.
Уильямснинг беваси Ғарб ОАВларига эри унга “миясини қайта ишга тушириш” истаги ҳақида гапирганини айтади. 2014 йилнинг ёзида актёр ўзини камар билан осиб, жонига қасд қилгани маълум бўлади.
Брюс Уиллис
Голливуднинг энг кўп маош олувчи актёрларидан бири ва “Ўтда ёнмас” фильми юлдузи ўтган йилнинг баҳорида нафақага чиқди: шифокорлар унга афазия (мия шикастланишидан кейин пайдо бўлиши мумкин бўлган нутқ бузилиши) ташхисини қўйишди.
Касаллик сабаб Брюс равон гапира олмай, сценарий сўзларини эслолмайди. 2023 йил бошида актёрнинг рафиқаси Эмма Хеминг ижтимоий тармоқда эрининг касаллиги ҳақида пост эълон қилади:
“2022 йил баҳорида Брюсга афазия ташхиси қўйилганини эълон қилганимиздан бери касаллик янада авж олди. Ҳозирда ташхис аниқлаштирилди: фронтотемпорал деменция (FТD сифатида маълум). Афсуски, мулоқот қилолмаслик Брюс курашаётган касалликнинг биргина аломати холос”.
11-октябрь куни Уиллиснинг яқин дўсти Гленн Гордон Керон The Sun нашрига берган интервьюсида актёрнинг аҳволи билан ўртоқлашар экан, Брюс энди севимли китобларини ўқиш имкониятига эга эмаслигини айтади:
“Суҳбатнинг дастлабки уч дақиқасида у мени танийди, деган ҳислар бор эди. Аммо у мени танимади, бунинг устига тўлиқ гапира олмасди ҳам. У турли адабиётларни ўқишни яхши кўрарди, лекин буни кўпчилик билишини хоҳламасди. Энди у ўқий олмайди. Ҳозир бундай кўникмаларга эга эмас, лекин у ҳали ҳам Брюс. У ёнингизда эканида бу Брюс эканлигини биласиз ва у олдингизда эканидан хурсанд бўласиз, лекин ... ҳаёт қувончи уни тарк этган”.
Изоҳ (0)