АҚШнинг Алабама штати Дедевил шаҳридаги туғилган кун кечасида содир бўлган отишмада тўрт киши ҳалок бўлди. Ўсмирлар синфдошининг 16 ёшини нишонлаётган эди. Воқеадан бир кун ўтганига қарамай, ҳужумчи ҳақида маълумотлар ошкор қилинмаяпти.
Отишмада жами 28 киши жароҳатланган, баъзиларининг аҳволи оғир.
АҚШ президенти Жо Байден яна бир бор қурол қонунчилигини кучайтиришга чақирди. “Қурол Америкадаги болалар қотиллари орасида биринчи ўринда туради ва бу рақамлар камайиш ўрнига фақат ортиб бормоқда”, — деди Байден Оқ уй веб-сайтида эълон қилган баёнотида.
“Болалар қўрқув сабаб туғилган кунга ҳам бора олмаса, мамлакатимиз қандай даражага келиб қолди?”, — қўшимча қилди у.
Дадевил — тахминан 3 200 га яқин одам яшайдиган шаҳарча, у ерда илгари бундай йирик отишмалар кузатилмаган.
Ҳодисани содир этганлар ҳақида ҳозирча кўп нарса маълум эмас. Reuters хабарига кўра, маҳаллий ҳукумат воқеа тафсилотларини ошкор этмаяпти.
Ҳужумчининг ўт очишдан мақсади, унинг ҳибсга олинган-олинмагани номаълум. Отишма қандай тўхтатилгани, гумонланувчининг ўзи тирик ёки йўқлиги ҳақида ҳам деярли ҳеч қандай маълумот берилмаган.
Штат полицияси вакилининг айтишича, тергов “узоқ ва мураккаб жараён” бўлади. Отишмада жароҳат олганларнинг аҳволи “ўта оғир” дан енгилгача.
Афтидан, қурбонларнинг аксарияти ўсмирлар бўлган. Жумаладан, Фил Дауделл исмли ўсмирнинг бувиси ОАВга набираси ҳалок бўлганини айтган. У ўрта мактабни тугатиб, Америка футболи ўйинчиси сифатида Жексонвил университетига стипендия асосида ўқишга кетмоқчи эди.
Алабама — фуқароларнинг қуролга эгалик қилиш ҳуқуқини ҳимоя қилиш билан танилган штат. Республикачи губернатор Кай Ивейнинг ҳамдардлик хабари ижтимоий тармоқларда қурол қонунчилигини ислоҳ қилувчиларнинг танқидига сабаб бўлди.
Изоҳ (0)