2023 йил бошида ўз ўқитувчисига қасддан ўқ узган 6 ёшли бошланғич синф ўқувчиси жиноий жавобгарликка тортилмайди, деди АҚШнинг Виржиния штати Нюпорт Нюс шаҳри ҳуқуқшуноси Ховард Гвин CNN’га.
Ричнек бошланғич мактаби ўқувчиси дарсда ўқитувчиси Абигел Звернер билан жанжаллашиб қолганидан кейин уни отиб, яралаган — у кўкрагига тегган ўқдан қаттиқ жароҳат олган. Ҳодисадан бир ҳафтадан кўпроқ вақт ўтгач, аёл касалхонадан чиқди.
“Ушбу масалани яхшилаб ўрганиб чиққанимиздан сўнг, биз қонун 6 ёшли болани оғир жиноятда айблаш ва унга ҳукм ўқишни қўллаб-қувватламайди, деган фикрга келдик”, — деди Гвин.
Расмийлар ўқитувчисига қарата ўқ узганликда айбланаётган бола ҳақида кўп тафсилотларни ошкор қилмади. Отишма содир бўлганидан тахминан икки ҳафта ўтиб эълон қилинган баёнотда боланинг оиласи “ўғлимизнинг қўлига тушган қурол ҳимояланган эди” деб айтди. Оиланинг баёнотида айтилишича, болада ўткир ногиронлик бўлган, у мактабда махсус режа остида ўқитилган, онаси ёки отаси у билан бирга мактабга бориб, ҳар куни дарсда бирга ўтирган.
Отишма содир бўлган ҳафтада боланинг ота-онаси илк бор унга ҳамроҳлик қилмаётган эди. “Ўша куни унинг ёнида бўлмаганимиздан бутун умр афсусланамиз”, деб қўшимча қилди улар.
АҚШда, айниқса, мактабларда қуролли ҳужумлар тез-тез содир бўлади. Май ойида Техаснинг Увалде шаҳрида ўсмир 19 ўқувчи ва икки бошланғич мактаб ўқитувчисини ўлдирган эди.
2022 йили АҚШда 44 000 дан ортиқ отишма қурбонлари қайд этилган. Қуролли зўравонлик архиви веб-сайтига кўра, уларнинг ярми ўз жонига қасд қилиш ва ярми қотиллик, бахтсиз ҳодисалар ёки ўзини ҳимоя қилиш ҳолатларида ҳалок бўлган.
Изоҳ (0)