Флоридадаги отишмада уч нафар афроамерикалик ҳалок бўлганидан кейин АҚШ президенти Жо Байден “оқ танлилар устунлиги” ҳақидаги ирқчилик ғоясини йўқ қилишга чақирди. Америка етакчисининг баёноти Оқ уй сайтида чоп этилди.
26 август, шанба куни Жексонвилл шаҳрида оқ танли эркак қора танлилар учун университет яқинидаги дўконда ўт очиб, уч нафар афроамерикаликни ўлдирган. Байденнинг сўзларига кўра, ҳуқуқ-тартибот идоралари воқеани нафратга асосланган жиноят ва экстремистик ҳаракат деб тахмин қилмоқда.
“Саволларга жавоб излашда давом этар эканмиз, Америкада оқ танлилар устунлигига ўрин йўқлигини аниқ ва қатъий айтишимиз керак. Дўконга борадиган қора танли оилалар ёки мактабга кетаётган қора танли ўқувчилар терисининг ранги туфайли ўқ узилишидан қўрқиб яшайдиган мамлакатда яшашга чек қўйишимиз керак. Бу ер нафрат макони бўлмаслиги керак”, — деди Байден.
Колорадо университети олимлари томонидан ўтказилган тадқиқотга кўра, 2014 йилнинг 1 январидан 2022 йилнинг 31 декабрига қадар Қўшма Штатларда 4 011 та оммавий отишма содир бўлган. Кўпинча улар мамлакат жануби-шарқида ва ўқотар қурол савдоси кучайтирилган Иллинойс штатида кузатилган.
Statista компанияси маълумотларига кўра, 1982 йилдан 2023 йил июлига қадар АҚШдаги 145 та оммавий отишманинг 76 таси оқ танлилар томонидан содир этилган (52 фоиз), 26 таси афроамерикаликлар (18 фоиз), 12 таси Лотин Америкасига мансуб кишилар (8 фоиз) ҳиссасига тўғри келади.
Изоҳ (0)