АҚШнинг Мен штати Льюистон шаҳрида 18 кишини ўлдирганликда гумон қилинган эркак уч кунлик қидирувдан сўнг ўлик ҳолда топилди, деб хабар бермоқда BBC полицияга таяниб.
“Чоршанбага ўтар кечаси уюштирилган отишмада гумонланаётган шахс топилди, у вафот этган”, — дейилади Андроскоггин округи шерифи матбуот хизматида.
Дастлаб отишмада 22 киши ҳалок бўлгани ҳақида хабар берилганди.
CBS News телеканалига кўра, 40 ёшли Роберт Карднинг жасади чиқиндиларни қайта ишлаш маркази ёнидан топилган. Полиция манбаларининг AP’га айтишича, у ўз жонига қасд қилган бўлиши мумкин.
AP, шунингдек, гумондорга алоқадор уйдан унинг ўз жонига қасд қилиш ҳақида сўз кетган қайднома топилганини хабар қилди. Ёзув Карднинг ўғлига қаратилган эди. Уйдан гумонланувчининг уяли телефони ҳам топилди.
Мен губернатори Жанет Миллс Льюистон шаҳар ҳокимиятида ўтказилган матбуот анжуманида қурбоннинг жасади Лисбонда, отишма содир бўлган жойдан унча узоқ бўлмаган ҳудудда топилганини айтди.
“Бугун мен Роберт Кард ҳеч кимга таҳдид солмаслигини билиб, енгил тин олдим”, — деди у.
Льюистон полицияси бошлиғи Девид Сент-Пьер ҳуқуқ-тартибот органларининг иши ҳали тугамаганини қўшимча қилди.
Полициянинг таъкидлашича, кўплаб тафсилотлар сир тутилмоқда, чунки расмийлар аввал қурбонларнинг оилалари билан гаплашмоқчи.
Изоҳ (0)