2024 йилдаги давлат бюджети ижроси бўйича қатор хато ва камчиликлар аниқланган. Бу ҳақда 6 май куни ўтказилган Олий Мажлис қонунчилик палатаси йиғилишда Ҳисоб палатаси раиси биринчи ўринбосари Меҳриддин Абдуллаев маълум қилди.
Меҳриддин Абдуллаевнинг айтишича, ўтган йили масофавий аудит ахборот тизими орқали ўтказилган текширувларда 2,3 трлн сўмлик бюджет харажатлари ноқонуний сарфлангани аниқланган.
“Йил давомида 998 млрд сўмлик шартномалар давлат харидларига оид қонунчиликка зид равишда тузилган. Шу билан бирга, 326 млрд сўмлик шартномаларни тузишда манфаатлар тўқнашувига йўл қўйилган, бюджет ташкилотларида иш ҳақларига 103 млрд сўм ортиқча харажат қилинган. Ўтган йили давлат бюджетига 728 млрд сўмлик солиқлар тўланмаган. Мазкур тизим орқали 1,6 трлн сўмлик шартномалар тузишда йўл қўйилаётган молиявий камчиликларнинг олди олинди”, деди палата масъули.
Меҳриддин Абдуллаев бир йил мобайнида бюджет харажатлари самарадорлиги ва қонунийлиги юзасидан 42 та аудит тадбирлари ташкил этилганини ҳам таъкидлади. Масъулга кўра, ўрганиш жараёнида 2,2 трлн сўмлик молиявий хато ҳамда камчиликларга йўл қўйилгани фош бўлган.
“Давлат бюджетига 621 млрд сўмлик қўшимча даромад манбалари аниқланди. Шундан 364 млрд сўми ундирилди. Қолаверса, 58 млрд сўмлик ноқонуний харажатларнинг олди олинди. Йиллик бюджет харажатларини 9,3 трлн сўмга қисқартилишига эришилди”, деди у.
Ҳисобот даврида давлат харидлари шартномалари алоҳида аудит тартибида ҳам ўрганилган. Оқибатда давлат харидлари бўйича тузилган шартномаларда 5,4 трлн сўмлик қонун бузилиш ҳолатлари аниқланган. Жами 3,6 трлн сўмлик харидлар тўғрисидаги маълумотлар ёпиқ очиқ ахборотлар тизимига жойлаштирилмаган.
Ўтган йили давлат ташкилотларига товар, иш ва хизматлар етказиб берувчи айрим таъминотчи корхоналар билан бюджет маблағлари ҳисобидан амалга оширилган савдо айланмасида 16,4 трлн сўм солиқлар камайтириб кўрсатилган. Оқибатда давлат бюджетига 1,8 трлн сўмлик солиқни ҳисобланмаслик ҳолати юзага келган.
Изоҳ (0)