Америка қўшма штатлари давлат департаменти Хитойнинг Chang Guang Satellite Technology компаниясини сунъий йўлдош тасвирлари орқали Ямандаги ҳусийлар ҳаракатини қўллаб-қувватлаганликда айбламоқда. Бу ҳақда Reuters хабар бермоқда.
АҚШ давлат департаменти матбуот котиби Темми Брюс ушбу компания ҳусийларга тўғридан тўғри ёрдам кўрсатаётганини айтиб, Хитой ҳукумати бу масала бўйича АҚШга мурожаат қилганига қарамай, компанияни қўллаб-қувватлашда давом этаётганини билдирган.
“Бу Хитойнинг ‘тинчликни қўллаб-қувватлайди’ деган баёноти асоссиз эканлигини исботлайди”, дейди Темми Брюс.
Дастлаб Брюс компания ҳусийларга қандай аниқ ёрдам кўрсатганини айтмаган. Бироқ кейинчалик у “хитойлик компания ҳусийларга сунъий йўлдош тасвирларини тақдим этгани”га аниқлик киритган.
Эслатиб ўтамиз, ҳусийлар Қизил денгиз ва Адан кўрфазидаги кемаларга 2023 йил ноябрь ойида ҳужум қила бошлаган. Ҳусийлар бу ҳужумларни Ғазо секторидаги фаластинликларни қўллаб-қувватлаш мақсадида амалга ошираётганликларини айтишган. Ушбу ҳужумлар Сувайш канали орқали юк ташишни тўхтатиб, кўплаб компанияларни Африка жануби орқали айланма йўлдан ўтишга мажбур қилди. Натижада юк ташиш нархи кескин ошди.
Маълумот учун Changuan космик сунъий йўлдош технологияси 2023 йилда АҚШ санкциялари рўйхатига киритилган. Бунинг сабаби у Россиянинг Украинага қарши урушида муҳим рол ўйнаган “Вагнер гуруҳи”ни сунъий йўлдошдан юқори аниқликдаги суратлар билан таъминлашда гумон қилинаётгани билан боғлиқ.
18 апрель куни АҚШ Ямандаги ҳусийларга ҳаво ҳужумлари уюштирди. Оқибатда 33 киши ҳалок бўлди, 80 киши жароҳатланди.
Изоҳ (0)