AQSHning Yamandagi husiylarga uyushtirgan havo hujumlari oqibatida 33 kishi halok bo‘ldi, 80 kishi jarohatlandi. Bu haqda The Guardian xabar berdi.
Hujumlar Ras Isa neft portiga qaratilgan bo‘lib, maqsad husiylarning moliyaviy manbalarini yo‘q qilish bo‘lgan. AQSH Markaziy qo‘mondonligi ushbu daromadlar so‘nggi 10 yildan buyon butun mintaqani dahshatga solish harakatlarini moliyalashtirib kelgan.
Ushbu zarbalar Yamandagi oddiy aholini nishonga olishga qaratilmagan. Ular husiylar zulmidan qutulishni va tinch hayot kechirishni istaydi, deyiladi AQSH qo‘mondonligi bayonotida.
Husiylar nazoratidagi al-Masirah sun’iy yo‘ldosh telekanali hujumdan keyingi holat aks etgan videoni namoyish etdi. Kadrlarda voqea joyida jasadlar yotganini ko‘rish mumkin. Telekanalning ta’kidlashicha, portda ishlayotgan fuqarolik xodimlari va tez yordam ishchilari ham halok bo‘lgan. Hujum oqibatida kuchli portlash va yong‘in yuz bergan.
9-aprel kuni AQSH davlat departamenti Yamanga neft yetkazib berish bo‘yicha ogohlantirish bergan edi:
AQSH hech qanday davlat yoki tijorat tashkilotining xorijiy terroristik guruhlarga, jumladan, husiylarga, kemalarni tushirish yoki neft bilan ta’minlash orqali yordam berishiga yo‘l qo‘ymaydi, deyilgan edi.
Associated Press tomonidan o‘tkazilgan tahlilga ko‘ra, Tramp boshchiligidagi yangi AQSG operatsiyasi, sobiq prezident Jo Bayden davridagidan ancha keng qamrovli. Endilikda faqat raketa uchirish joylari emas, balki yuqori martabali shaxslar va butun shaharlar ham nishonga olinmoqda.
AQSH va Isroil ularning kemalari nishonga olinishiga javoban husiylarning harbiy obyektlari va tizimlariga zarbalar bermoqda. Yaman husiylari G‘azo sektoridagi urush sababli Isroilga aloqador kemalarni nishonga olib kelmoqda.
2023-yil noyabridan 2024-yil yanvarigacha husiylar 100 dan ortiq savdo kemalariga raketa va dronlar bilan hujum qilgan. Oqibatda ikki kemani cho‘ktirgan va to‘rt dengizchi halok bo‘lgan. Husiylar Amerika harbiy kemalariga ham hujum qilgan, ammo bu muvaffaqiyatsiz kechgan.
Tramp ma’muriyati husiylarga qarshi zarbalarni Eronning rivojlanayotgan yadroviy dasturiga bosim o‘tkazish vositasi sifatida ham ko‘rib chiqmoqda.
Izoh (0)