Ғарб разведка агентликлари Хитойнинг Яман ҳусийларига беихтиёр ёрдам бераётганини маълум қилди.
Хитой ҳукумати Эрон нефтини сотиб олмоқда, бу нефтни эса Ислом инқилоби қўриқчилари корпусининг махсус ҳарбий қисми — “Қудс” сотяпти. Politico манбаларининг айтишича, “Қудс” ҳусийларни тайёрлайди ва молиялаштиради.
Исми ошкор этилмаган Ғарб мулозимининг сўзларига кўра, Хитой бу “қўллаб-қувватлашни” беихтиёр қилади, чунки Пекиннинг ўзи ҳусийларнинг Қизил денгиздаги ҳаракатларидан азият чекмоқда.
“Менимча улар ўзлари ўтирган дарахт шохини кесиб ташлашаётганини тушунишмаяпти”, — деди у Politico нашрига. Хитой ҳукумати Politico’нинг изоҳ сўраб йўллаган сўровига жавоб бермади.
Яман ҳусийлари 2023 йилнинг кузидан бери Қизил денгиздаги АҚШ ва Британия кемаларига, шунингдек, Исроил билан боғлиқ кемаларга ҳужум қилмоқда. Улар Исроил билан урушда Фаластиннинг ҲАМАС ҳаракатини қўллаб-қувватламоқда. Ҳусий вакиллари Хитой ва Россия кемаларига ҳужум қилмасликка ваъда беришди.
Бироқ 24 март куни АҚШ Марказий қўмондонлиги исёнчилар Панама байроғи остида сузиб кетаётган Хитойнинг “Ҳуанг Пу” танкерига ракета билан ҳужум қилгани ҳақида хабар берди. Кема катта зарар кўрмади. Х ижтимоий тармоғида ўз ҳужумлари ҳақида хабар берган ҳусийларнинг ўзлари бу ҳолатга изоҳ бермаган. Хитой ҳукумати ҳам бу воқеага изоҳ бермади.
Изоҳ (0)