Хитой Қизил денгиздаги савдо кемаларига ҳужумлар туфайли савдо хавфи борлигига қарамай, ҳусийларга қарши курашда иштирок этишни истамаяпти, деб ёзди Bloomberg. АҚШ ва Буюк Британия Ямандаги исёнчилар позицияларига ҳаво ҳужумларини амалга ошираётган бир пайтда, Пекин “чеккада туришни афзал кўрмоқда”.
Шу билан бирга, Хитой Қизил денгизда хавфсизликни сақлаш глобал савдо ва таъминот занжирлари учун муҳим эканини таъкидламоқда. Bloomberg маълумотларига кўра, мамлакат хом нефтнинг қарийб ярмини Яқин Шарқдан импорт қилади ва Европа Иттифоқига АҚШга қараганда кўпроқ маҳсулот етказиб беради.
Bloomberg Intelligence маълумотларида айтилишича, Шанхайдан дунёнинг энг йирик портларига тўхтаб ўтиш ставкаларини кузатувчи Shanghai Containerized Freight Index индекси ўтган ҳафта 2022 йил сентябридан бери энг юқори даражага кўтарилди. Бу Африка бўйлаб кемаларни қайта йўналтириш зарурати билан боғлиқ қўшимча харажатларни акс эттиради.
Бироқ, Bloomberg ёзишича, Хитой раҳбари Си Цзиньпин наздида йўқотилаётган сумма ҳусийларга қарши курашда иштирок этиш учун етарли даражада юқори эмас, унда “иштирок этиш баҳоси иштирок этмасликдан кўра қимматга тушади”. Яқин Шарқда “Америкага қарши кайфият кучайган” бир пайтда Си аралашмаслик ва ҳакам ролини ўйнашни танламоқда.
Си Цзиньпин ўтган йил давомида Яқин Шарқ давлатлари билан алоқаларни кучайтирди. Минтақадаги баъзи давлатлар Пекинни можаронинг кенгайишини олдини олиш учун “ўз таъсиридан фойдаланишга” чақирган, деди Bloomberg манбалари. Бироқ Пекин, Нидерландиянинг Гронинген университети доценти Уилям Фигероанинг фикрича, “катта можарога аралашишни истамайди”, Хитойнинг ҳусийларни қоралаши эса “Теҳрондаги иттифоқчиларини хафа қилиши мумкин”.
Изоҳ (0)