“Хавф чегараси”, “Эдисон”, “Миллиардерлар клуби” ва бошқа кўплаб фильмларда иштирок этган 64 ёшли актёр Кевин Спейсининг уйи очиқ кимошди савдосида 3,24 миллион долларга сотилди, дея хабар бермоқда “Правила жизни” нашри.
Ҳарборвю ҳудудида жойлашган беш қаватли уйнинг майдони 836 метр квадратни ташкил қилади. Хонадонда олтита ётоқхона, еттита ҳаммом, сауна, кинотеатр ва энг юқори қаватида махсус терраса мавжуд.
Аукцион тахминан 10 дақиқа давом этди ва кўчмас мулк маҳаллий қурилиш компанияси раҳбари томонидан сотиб олинди. Мазкур лот хариди Балтимор суди томонидан тасдиқланиши кутилмоқда.
“Ҳудуддаги ҳеч қайси бинони ушбу кўчмас мулк билан таққослаб бўлмайди. Хонадон жойлашув жиҳатдан жуда қулайдир”, — деди аукцион ғолибининг вакили.
2017 йилда Кевин Спейси Энтони Реппга нисбатан зўравонлик ва таъқиб қилганликда айбланди. Натижада икки карра “Оскар” совриндорига қарши жиноят иши қўзғатилди. Бир неча судловлардан кейин, 2022 йилда Нью Йоркдаги ҳакамлар ҳайъати Кевин Спейсини айбсиз деб топди, бироқ суд харажатларини қоплаш учун миллионлаб қарзга ботган актёр ўз уйини сотишга мажбур бўлди.
Икки йил давомида қарзларни ундириб берувчи коллекторлик компания бинони мусодара қилишга ҳаракат қилди, кўчмас мулкни сотиш ҳуқуқи эса кейинроқ берилди.
“Суд томонидан менга тайинланган харажатларни тўлай олмайман”, дея тан олган эди Спейси Пирс Морганга берган интервьюсида. Актёрнинг сўзларига кўра, эндиликда Кевин бошпанасиз қолган ва қаерда яшашни билмайди.
Изоҳ (0)