Андижон вилоятининг Марҳамат туманида уйлари бузилиб, ер участкалари давлат эҳтиёжи учун олиб қўйилган 61 нафар фуқарога компенсация пуллари ундириб берилди. Бу ҳақда МИБ вилоят бошқармаси ахборот хизмати маълум қилди.
Маълум бўлишича, 2019 йилда Марҳамат тумани маркази “Обод туман” давлат дастурига киритилган. Туман марказидаги Мустақиллик кўчасида яшовчи фуқароларнинг уйлари олд қисми бузилиб, ер участкалари давлат эҳтиёжи учун олиб қўйилган.
Шунга кўра, фуқаролик ишлари бўйича Асака туманлараро судининг ижро ҳужжатларига асосан қарздор “Андижон вилояти ҳокимлиги ҳузуридаги давлат ва жамият эҳтиёжлари учун ер участкаларининг олиб қўйилиши муносабати билан жисмоний ва юридик шахсларга етказилган зарарларни қоплаш бўйича марказлаштирилган жамғармаси”дан ундирувчи Марҳамат туманида яшовчи 65 нафар фуқаро фойдасига жами 7,8 млрд сўм миқдорида етказилган зарарларни (компенсация) ундириш белгиланган.
Мажбурий ижро бюроси Андижон шаҳар бўлими томонидан белгиланган тартибда ижро ҳаракатлари амалга оширилиб, жорий йилнинг ноябрь—декабрь ойи давомида 61 нафар фуқарога жами 6 млрд 600 млн сўм компенсация пуллари ундириб берилган.
Ҳозирда 4 нафар фуқаронинг салкам 1 млрд сўм ҳақдорлигини ундириш бўйича ижро ҳаракатлари давом этмоқда.
Изоҳ (0)