Андижон вилоятининг Бўстон туманида яшовчи 74 ёшли фуқарога 5 нафар фарзандидан алимент пуллари ундириб берилди. Бу ҳақда “Дарё”га МИБ вилоят бошқармаси ахборот хизмати хабар берди.
Маълум қилинишича, Бўстон туманида яшовчи 74 ёшли отахон 2015 йилда айрим сабабларга кўра, 5 нафар ўғлидан алимент ундириб беришини сўраб судга мурожаат қилган.
Фуқаролик ишлари бўйича Бўстон туманлараро суди отахоннинг даъвосини қаноатлантириб, ҳар бир ўғилдан ойига 70 минг сўмдан алимент ундириб борилиши юзасидан қарор чиқарган.
Ижро ҳаракатлари давомида отахон 4 ўғлидан алимент олишдан воз кечган ва биргина ўғли алимент тўлаш учун масъул бўлиб қолган.
Ўтказилган тушунтиришлар натижасида алимент тўлашга масъул фарзанд отаси учун алимент қарзи ва келгуси 5 йиллик алимент тўловларини олдиндан беришини маълум қилди. Натижада жами 5 миллион 100 минг сўм отахонга тегишли тартибда ундириб берилди.
Шундан сўнг отахон 2029 йилгача ҳисобланган алимент пулларини олгани сабабли ижро ҳужжатини қайтариб олишни сўраб мурожаат қилган.
Маълумот учун, Ўзбекистон Республикаси Конституциясининг 80-моддаси ва Оила кодексининг 109-моддасида вояга етган, меҳнатга лаёқатли фарзандлар ўз ота-оналари ҳақида ғамхўрлик қилишга мажбурдирлар, деб ёзилган.
Изоҳ (0)