Фарғона вилоятида МИБ аралашуви билан келин сепи эрининг уйидан олиб берилди. Бу ҳақда бюро ахборот хизмати “Дарё”га хабар берди.
Келтирилишича, Фарғона вилоятида жорий йил май ойида қурилган никоҳ икки ой ҳам ўтмай келишмовчилик сабабли бузилган ва келин-куёв алоҳида яшай бошлаган. Келин куёвдан сепини қайтаришни талаб қилиб, судга мурожаат қилган.
Қонунчиликда виндикацион даъво деган тушунча бор (Фуқаролик кодекси 228-модда). Унга кўра, мулкдор ўз мол-мулкини бошқа шахснинг қонунсиз эгалигидан талаб қилиб олишга ҳақли дейилган. Виндикацион даъво қоидаларига асосан келинга ўз сепидаги мол-мулкларни олиб бериш ҳақида фуқаролик ишлари бўйича Фарғона туманлараро суди август ойида қарор чиқариб, уни МИБга юборган.
Ижро ҳужжатига асосан ундирувчи С.Й. фойдасига қарздор М.А.дан жами 12 турдаги 10 миллион 900 минг сўмлик мулклар олиб берилиши кўрсатилган. Келин сепида 6 та катта кўрпа, 6 та кичик кўрпа, 8 та даврихона, ёстиқ, 1 дона дазмол, 1 дона электр чойнак, 2 дона гилам 1 дона пойабзал қўядиган ва бошқа ашёлар кўрсатиб ўтилган.
Олиб борилган мажбурий ижро ҳаракатлари давомида 17 сентябрь куни ундирувчи С.Й.га қарздор М.А.дан жами мулклар тўлиқ олиб берилган.
Сепларини МИБ орқали ундирган келинлар
Фарғона вилояти Қўқон шаҳрида келин эрининг уйидан сепларини, 7 турдаги мулкларни МИБ орқали ундириб олган. Шунингдек, Андижон вилоятида келин эрининг уйидан сепларини, 43 турдаги буюмлар, уй жиҳозлари ва анжомларини МИБ орқали қайтариб олганди.
Шу каби Қорақалпоғистоннинг Амударё туманида келиннинг сепи эрининг уйидан МИБ орқали олиб берилган эди. Олиб берилиши лозим бўлган қариб 15 миллион сўмлик 46 атамадаги сеп мол-мулклар даъвогарга олиб берилиб, суд қарори ижроси амалда таъминланган.
Изоҳ (0)