Қашқадарё вилоятида якшанба куни раҳбарияти топшириғига кўра ишга жалб қилиниб, ток уриши оқибатида вафот этган ходимнинг оиласига моддий ва маънавий зарар ундириб берилди. Бу ҳақда вилоят Камбағалликни қисқартириш ва бандлик бошқармаси ахборот хизмати хабар берди.
“Дарё”да Қарши туманида яшовчи 36 ёшли марҳум Бобур Шералиевнинг якшанба куни ишга чақирилиб, уйига ўлик ҳолда қайтгани ҳақида мақола эълон қилинганди.
Уч фарзанднинг отаси бўлган Бобур Шералиев ўлимига қадар 12 йил давомида Қарши шаҳар Ободонлаштириш бошқармасида ишлаб келган. У 2023 йилнинг 18 июнь, якшанба куни ишга чақирилган.
“Шоира деган опа бор. У ҳар куни эрталаб 05:30 ларда телефон қиларди. Ўша куни ҳам телефон қилиб, Бобур кел деб телефон қилди. Кейин чиқиб кетди. Аслида шанба, якшанба дам куни, аммо дам йўқ эди”, — деганди марҳумнинг хотини Зубайда Иноятова.
Қашқадарё вилоят Камбағалликни қисқартириш ва бандлик бошқармаси ахборот хизмати эълон қилган видеода айтилишича, суд марҳумнинг оиласига 167 миллион сўм моддий ва маънавий зарарни ундириб берган.
Шунингдек, уч нафар фарзандим учун ҳар ой нафақа пули тўлаб берилмоқда, — дейди марҳумнинг беваси Зубайда Иноятова.
Изоҳ (0)