Мадриднинг “Реал” клуби футболчилари — ҳимоячи Антонио Рюдигер ва ярим ҳимоячи Жуд Беллингем ўртасида машғулотлар пайтида зиддият юзага келган. Бу ҳақда журналист Эду Агирре хабар берган.
Манбага кўра, жума кунги машғулот давомида футболчилар оғзаки тортишувга киришган. Бироқ можарога тез орада нуқта қўйилган — улар бир-бирига қўл бериб, муаммони ҳал қилишган.
Якшанба куни бўлиб ўтган “Алавес”га қарши ўйинда (1:0) ҳар иккала футболчи ҳам майдонга тушди: Рюдигер асосий таркибда тўлиқ ўйин ўтказган бўлса, Беллингем 63-дақиқада захирадан майдонга чиқди. Ушбу ғалабадан кейин “қироллик клуби” ҳисобидаги очколар сони 66 баллга етди. Улар турнир жадвалида 1-ўринни эгаллаб турган “Барселона”дан 4 очко ортда бормоқда.
Эслатиб ўтамиз, “Реал” 16 апрель куни УЕФА Чемпионлар Лигаси чорак финал жавоб ўйинида “Арсенал”га қарши майдонга тушади. Биринчи баҳсда “канонирлар” 3:0 ҳисобида ғалаба қозонган эди.
Изоҳ (0)