Лондоннинг “Арсенал” клуби ярим ҳимоячиси Деклан Райс Чемпионлар Лигаси 1/4 финал босқичидаги “Реал Мадрид”га қарши илк ўйинда (3:0) икки марта жарима зарбасидан гол урди. Маълумотларга кўра, бу икки гол “Реал” ҳужумчиси Килиан Мбаппе бутун фаолияти давомида (516 ўйинда, 1 гол) жарима зарбасидан урган голлар сонидан кўп.
Мбаппе жарима зарбасидан ягона голини Ла Лиганинг 29-туридаги “Леганес”га қарши баҳсда киритган. Райс бу натижани мадридликларга қарши биргина баҳсда уддалади. У биринчи голни 58-дақиқада, иккинчисини эса 70-дақиқада жарима зарбасидан киритди. “Канонирлар”нинг 3-голи Микель Мерино номига ёзилди.
Жорий мавсумда Деклан Райс “Арсенал” сафидаги барча турнирлар доирасидаги 42 та ўйинда майдонга тушиб, ўз ҳисобига 5 та гол ва 8 та голли узатмани ёздириб қўйган. Унинг лондонликлар билан шартномаси 2028 йилнинг ёзигача амал қилади. Transfermarkt Райснинг қийматини 110 миллион еврога баҳоламоқда.
Маълумот учун, “Реал Мадрид” — “Арсенал” жамоалари ўртасидаги жавоб баҳси 16 апрелдан 17 апрелга ўтар кечаси Мадридда бўлиб ўтади. Учрашув Тошкент вақти билан 00:00 да бошланади.
Изоҳ (0)