Madridning “Real” klubi futbolchilari — himoyachi Antonio Ryudiger va yarim himoyachi Jud Bellingem o‘rtasida mashg‘ulotlar paytida ziddiyat yuzaga kelgan. Bu haqda jurnalist Edu Agirre xabar bergan.
Manbaga ko‘ra, juma kungi mashg‘ulot davomida futbolchilar og‘zaki tortishuvga kirishgan. Biroq mojaroga tez orada nuqta qo‘yilgan — ular bir-biriga qo‘l berib, muammoni hal qilishgan.
Yakshanba kuni bo‘lib o‘tgan “Alaves”ga qarshi o‘yinda (1:0) har ikkala futbolchi ham maydonga tushdi: Ryudiger asosiy tarkibda to‘liq o‘yin o‘tkazgan bo‘lsa, Bellingem 63-daqiqada zaxiradan maydonga chiqdi. Ushbu g‘alabadan keyin “qirollik klubi” hisobidagi ochkolar soni 66 ballga yetdi. Ular turnir jadvalida 1-o‘rinni egallab turgan “Barselona”dan 4 ochko ortda bormoqda.
Eslatib o‘tamiz, “Real” 16-aprel kuni UEFA Chempionlar Ligasi chorak final javob o‘yinida “Arsenal”ga qarshi maydonga tushadi. Birinchi bahsda “kanonirlar” 3:0 hisobida g‘alaba qozongan edi.
Izoh (0)