Испания Ла Лигаси нуфузи бўйича дунёда етакчи ўринларда туриши ҳеч кимга сир эмас. Шунга яраша у ерда барча даврларда энг юқори даражали футболчилар тўп суриб келган. Football Whispers нашри Ла Лига тарихидаги энг кучли футболчилар ҳақида материал тайёрлади. Қуйида ушбу мақола ўзбек тилида тақдим этилади.
Ладислав Кубала
Рўйхат ўтган асрнинг 50 йилларида порлаган венгриялик футболчи Ладислав Кубаладан бошланади. У 1951 йилда «Барселона»га ўтади. Дастлаб кўпчилик у ҳақида ҳеч нарса билмас эди, боиси у голларни асосан ватанида урганди. Аммо у тезда барча танқидчиларнинг овозини ўчиришга муваффақ бўлади.
Испаниядаги илк мавсумида у 26 та гол уради ва ҳатто бир ўйинда рақиб дарвозасини еттита марта ишғол қилган ҳола ҳам кузатилган. Дастлабки уч мавсумда Кубала икки марта Испания чемпионлигини ва 3 марта мамлакат Кубогини қўлга киритади. У «Барса»даги фаолияти давомида 280 та гол уради ва 11 та совринга эга чиқади.
Икер Касильяс
Касильяс ушбу рўйхатдаги ягона дарвозабон ҳисобланади. Жаҳон чемпиони ва икки карра Европа чемпионати ғолиби «Реал» сафида 18 ёшида дебют қилган. Шунингдек, у Чемпионлар Лигасида майдонга тушган энг ёш дарвозабонга айланиш билан бирга мусобақада ҳам ғалаба қозонади.
Умумий ҳисобда Касильяс «қироллик клуби» сафида 725 та ўйин ўтказган. У шулардан 177 тасида ўз дарвозаси дахлсизлигини сақлаб қола олган. Икер қўлга киритган совринлари қаторига эса учта Чемпионлар Лигаси, бешта Испания чемпионати бош соврини ва иккита Испания Кубогини киритиш мумкин.
Рауль
«Реал» тарихидаги иккинчи энг яхши тўпурарнинг бу рўйхатдан тушиб қолиши шунчаки мантиқсизлик бўларди. У «Реал»даги фаолиятини 15 ёшида бошлаган. У «қаймоқранглилар» сафига азалий рақиб «Атлетико» сафидан кўчиб ўтади. Шу тариқа у жамоа тарихидаги энг ёш ўйинчига айланади, ўзининг дастлабки голини эса айнан собиқ жамоасига қарши ўйинда уради.
Раулнинг «Реал»даги дебют мавсуми чемпионлик ва шахсий мукофот билан якунланади. У Испаниядаги фаолияти давомида олти марта Испания чемпиони бўлишдан ташқари уч марта Чемпионлар Лигасида ҳам ғалабани тантана қилган.
Дани Алвес
Дани Алвесннинг Ла Лига тарихидаги энг яхши ўнг қанот ҳимоячиси эканлиги ҳақида ҳеч ким баҳслашмаса керак. У «Барселона»га кўчиб ўтгач, дарҳол жамоанинг алмаштириб бўлмас футболчилардан бирига айланди. 2008 йилдан 2016 йилгача бўлган даврда у «Барселона»га учта Чемпионлар Лигаси бош соврини, бешта Испания Кубоги ва олти марта мамлакат чемпионати ғолиблигини қўлга киритишда ёрдам беради.
Умуман олганда, бразилиялик футболчи Ла Лигада 400 дан ортиқ ўйин ўтказган. Алоҳида қайд этиш жоиз бўлган бир жиҳат шуки, у нафақат ҳимояда, балки ҳужумда ҳам манаман деган олдинги чизиқ вакиллари билан рақобатлаша оларди.
Франциско Хенто
Хентонинг совринларига назар ташлаган инсон унинг Ла Лига тарихидаги энг яхши ўйинчиларда бири эканига шубҳа қилмайди. У умумий ҳисобда 12 марта Испания чемпионлигини қўлга киритган. Бундан ташқари Хенто халқаро майдонда ҳам ҳавас қиларли ютуқларга эришган. У олти карра Европа Чемпионлар Кубоги соҳиби ҳисобланади.
Хенто тезкорлиги билан машҳур бўлиб, у мазкур хусусияти орқали рақиб ҳимоячиларини доғда қолдириб келган. У Ла Лигада 438 марта ўйин ўтказган, барча мусобақаларда эса бу кўрсаткич 650 тага тенг.
Серхио Рамос
Серхио Рамос Испания футболи тарихидаги энг буюк ҳимоячилардан бири ҳисобланади. Уни «Севилья» тарбиялаган бўлса-да, аммо «Реал» тезда ёш истеъдодни ўз таркибига қўшиб олади. Рамос янги клуби сафида садоқатли ўйинчига айланади.
Харизматик ва ўзига хос футболчи бўлган Рамос майдонда исталган ишни амалга ошириши мумкин. У ҳимояда ўтиб бўлмайдиган қоя бўлиб, марказда ҳам, қанотда ҳам бир хил даражада ўйнай олади. Рамос «Реал» сафида 100 та гол уриб, чемпионат тарихида энг кўп гол урган ҳимоячига айланган. Шунингдек, у Мадрид клуби либоси остида 500 дан ортиқ учрашувда майдонга тушган.
Хави ва Андрес Иньеста
Гап бу икки футболчи ҳақида кетганида барча қоидалар четга чиқади. Ҳа, бу бироз бўрттириб кўрсатишдек туюлиши мумкин, аммо бу иккаласини бир-биридан ажратиб бўлмаслиги бор гап. Агар футболчилар биргаликда ўйнамаган бўлганида, уларнинг ютуқлари у қадар таъсирли чиқмаган бўларди. Хави 1998 йилда, «Барселона» Ла Лигада ғалаба қозонган маҳал жамоадаги дебютини ўтказган. 2002 йилда, Андрес Иньеста ярим ҳимояда пайдо бўлгунга қадар бу унинг ягона соврини эди. Ушбу дуэт шу қадар кучли эдики, ўн йилдан ошиқ вақт давомида «Барселона»ни уларсиз тасаввур қилиш шунчаки имконсиз эди.
Биринчи медалдан ташқари Хави Иньеста билан яна еттита совринга эга чиққан. Уларнинг энг яхши мавсуми 2012/13 йил бўлиб қолди. Ўшанда «Барса» Ла Лигада 100 очко жамғарганди. Хави кетганидан кейин ҳам Иньеста ўйнашда ва ғалаба қозонишда давом этди. Аммо барибир унинг ёнида Хавининг йўқлиги сезилиб турарди. Улар биргаликда тўрт марта Чемпионлар Лигаси бош совринига эга чиққан. Хави жамоадан кетгач (2015 йилда), каталонияликлар Чемпионлар Лигасида бирор марта ҳам чорак финалдан нарига ўта олмаган.
Криштиану Роналду
2009—2018 йилларда «Реал» таркибида ўйнаган Роналду бу давр ичида нафақат ўзи янги босқичга чиқди, балки клубни ҳам янги ғалабалар сари етаклаб, унинг янада оммалашишига беқиёс ҳиссасини қўшди. Испаниялик мухлислар уни ва унинг ёрқин ўйинларини ҳеч қачон унутмаслиги аниқ.
Роналду «Реал»да ўйнаган кезлари 438 ўйинда 451 та гол урган, бу бир ўйинда битта голдан кўпроқ деганидир. Фақат Ла Лиганинг ўзида футболчи 292 ўйинда 311 гол ва 96 голли узатмани амалга оширган.
Португалияликнинг ёрдами билан «қироллик клуби» ўзининг кубоклар тўпламини ҳам кенгайтириб олганини алоҳида таъкидлаш жоиз, Чемпионлар Лигасида тўртта, Ла Лига ва Испанияда Кубогида икки мартадан ғалабани тантана қилган. Роналдунинг ўзи эса «Реал» тарихидаги энг яхши тўпурарга айланган ва «Олтин тўп»ларининг асосий қисмини шу клуб сафида қўлга киритишга муваффақ бўлган.
Альфредо ди Стефано
Ла Лига ихлосмандлари Альфредо ди Стефанонинг ажойиб ўйинчилигини инкор этмаслиги аниқ. Қизиғи, аргентиналик футболчи фаолиятининг бошида «Реал»да ҳам, «Барса»да ҳам ўйнаш имкониятига эга эди. Аммо каталонияликлар ди Стефанонинг келажагига ишонмаган ҳолда уни «қаймоқранглилар»га бериб юборади.
Альфредо ди Стефано ўн йилдан ортиқ вақт давомида Мадридда ўйнади ва у ерда ўз ишининг энг яхшилардан бири эканлигини исботлади. У «Реал» сафида 396 ўйинда 308 та гол уради. Альфредо «Реал»га кетма-кет беш марта Европа Кубогини, шунингдек, саккиз марта Ла Лига ва бир бор Испания Кубогини ютишда ёрдам берган. Шу ўринда ди Стефанонинг икки карра «Олтин тўп» соҳиби бўлганини ҳам алоҳида таъкидлаб ўтиш лозим.
Лионель Месси
Ва ниҳоят навбат аргентиналик сеҳргар — Лионель Мессига келди. 13 ёшида «Барселона»га келган болакай йиллар ўтиб, нафақат клубнинг, балки бутун бир футбол тарихидаги энг яхши икки ўйинчининг бирига айланди. Шунчаки ақл бовар қилмас ҳикоя, шундай эмасми?
10 та чемпионлик унвони ва Роналдудан 150 тага кўпроқ гол. Бу Мессининг Ла Лигадаги натижасидир. У Испания чемпионатининг 2011/12 йилги мавсумида 37 ўйинда 50 та гол уришга эришган. Шунингдек, Месси «Барселона» таркибида тўрт марта Чемпионлар Лигасида ва олти бор Испания Кубогида ғалаба қозонган. Шунингдек, Месси 6 та «Олтин тўп»ининг барчасини «Барселона» таркибида қўлга киритган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)