«Барселона» 3 йилдан бери «Реал»ни юта олмаяпти. Мадрид клуби ўз тарихида 2 марта кетма-кет 5 та «Эль-Класико»да ғалаба қозонди

«Реал» Испания Суперкубоги ярим финалидан ўрин олган ўйинда қўшимча дақиқаларда «Барселона»ни 3:2 ҳисобида мағлуб этди.

Бу «қироллик клуби» учун «Барселона»га қарши ўйинлардаги кетма-кет 5-ғалаба бўлди. Бу орқали жамоа ўз тарихида иккинчи бор шундай натижага эришди. Бунгача 1962—1965 йиллар оралиғида ҳам жамоаларнинг ўзаро қарама-қаршилигида шундай натижа содир бўлганди, ўшанда «Реал» «Барселона»га қарши 7 ўйиндан иборат ғалабали серия қайд этганди.

«Кўк-анорранглилар» охирги марта 2019 йилнинг 2 мартида «Класико»да ғалаба қозонган. Шундан кейин ўтказилган 6 ўйиннинг 5 тасида Мадрид клубининг қўли баланд келган, яна битта баҳс дуранг натижа билан якунланган.

Шунингдек, ушбу ғалаба «Реал» учун «Барселона» устидан қозонилган 100-ғалаба бўлди. Клублар умумий ҳисобда 248 марта тўқнаш келган. Каталонияликларда бу кўрсаткич 96 та ўйинга тенг. 52 беллашув эса дуранг билан якунланган. Тўплар нисбати «Реал» фойдасига 415 га 404 ни ташкил қилади.

Қайд этиш ўринли, 2022 йилнинг 20 март санасида клублар Ла Лиганинг 2-давраси доирасида яна тўқнаш келади.

«Барселона» ҳимоячиси Дани Алвес эса «Эль-Класико»да майдонга тушган энг ёши катта футболчига айланди. У 38 ёш-у 251 кунлигида ушбу натижага эришди.

Бундан олдинги рекорд дарвозабон Хосе Пинтога тегишли эди, у 2014 йилда «Реал»га қарши ўйинда 38 ёш-у 159 кунлик бўлган.