Самарқанд вилояти Экология, атроф-муҳитни муҳофаза қилиш ва иқлим ўзгариши бошқармаси томонидан Нарпай туманидаги хусусий корхона фаолияти текширилди. Бу ҳақда Экология вазирлиги хабар берди.
Назорат тадбири давомида Қорадарё дарёси ҳудудида ушбу корхона ходимлари томонидан 1 та экскаватор ва 4 та юк машинаси ёрдамида қум-шағал аралашмасини ноқонуний қазиб олиш ва уни майдалаш заводига олиб кетиш ҳолати аниқланди.
Мазкур ҳолат юзасидан ҳуқуқбузарларга нисбатан тегишли ҳужжатлар расмийлаштирилди.
Табиатга етказилган зарар миқдори 2 млрд 722 млн 666 минг сўм эканлиги аниқланди. Йиғилган ҳужжатлар ҳуқуқий баҳо бериш учун Бош прокуратурага юборилди.
Дарёлар ўзанларидаги норуда материалларни қазиб олишга муддатсиз мораторий жорий этилган
Президент фармони билан Чирчиқ, Сангзор, Зарафшон, Норин, Қашқадарё, Сурхондарё ва Сирдарё дарёлари ўзанларидаги норуда материалларни қазиб олишга 2024 йил 1 майдан муддатсиз мораторий жорий қилинди. Ноқонуний қазиб олиш ишлари натижасида табиатга етказилган зарар учун жавобгарлик ҳам кучайтирилди.
Шунга қарамай, ноқонуний қум-шағал қазиб олиш давом этмоқда. 12 февраль куни Сурхондарё ва Тошкент вилоятларида табиий қум хом ашёсини ўзбошимчалик билан қазиб олиш ҳолатлари фош этилди. Тошкент вилояти Бекобод туманида ноқонуний равишда қум қазиб олиниши оқибатида табиатга 100 миллиард сўмдан ортиқ зарар етказилди.
13 январда Самарқанднинг икки ҳудудида қум-шағал қазиб олиниши оқибатида табиатга 826 миллиард сўм зарар етказилганди.
Изоҳ (0)