Тошкент вилояти Бекобод туманида табиатга 100 миллиард сўмдан ортиқ зарар етказилди, деб хабар бермоқда Экология вазирлиги.
Хабарда айтилишича, Тошкент вилояти Экология, атроф-муҳитни муҳофаза қилиш ва иқлим ўзгариши бошқармаси томонидан Бекобод тумани “Фарҳод” МФЙ ҳудудида навбатдаги экологик назорат тадбири ўтказилди.
Тадбир давомида фуқаролар томонидан ноқонуний равишда қум қазиб олинаётгани аниқланди. Ҳолат юзасидан ўрганиш олиб борилганда, табиатга 100 миллиард 627 миллион 800 минг сўм миқдорида зарар етказилгани маълум бўлди.
Ҳолатга ҳуқуқий баҳо бериш учун тўпланган барча ҳужжатлар ҳуқуқни муҳофаза қилиш органларига юборилди.
Норуда материалларни қазиб олиш ҳолатлари
Ҳукумат қарори билан норуда материалларни қазиб олиш бўйича мораторий татбиқ этилган ҳудудларнинг чегаралари белгиланганди. Бунда мораторий татбиқ этиладиган дарёлар ҳудудлари чегараларига дарё ўзанлари, уларнинг соҳилбўйи минтақалари ва сувни муҳофаза қилиш зоналари киради.
Бундан аввал Қашқадарёда табиий қум қазиб олиниши натижасида табиатга 6 млрд сўмдан ортиқ зарар етказилгани ҳақида хабар берилганди.
2024 йилнинг октябрь ойи охирида Чирчиқ дарёсидан қум-шағал аралашмаси қазиб олиниши оқибатида табиатга 273,8 млрд сўм зарар етказилганди.
Ноябрь ойи бошида эса Қашқадарё ва Самарқанд вилоятларида фойдали қазилмаларни ўзбошимчалик билан қазиб олиш ҳолатлари фош этилганди. Чирчиқ дарёсидан қум-шағал аралашмаси қазиб олиниши оқибатида табиатга 273,8 млрд сўм зарар етказилгани ҳақида хабар берилганди. Сурхондарёда табиий қум қазиб олиниши натижасида 2 млрд сўм зарар етказилган.
Изоҳ (0)