Самарқандда ўтказилган рейд давомида табиатга катта миқдорда зарар етказилган қонунбузарлик ҳолатлари аниқланди. Бу ҳақда Экология вазирлиги хабар берди.
Маълум қилинишича, Пастдарғом тумани ҳудудида бир гуруҳ фуқаролар томонидан тунги соат 03:00 да ноқонуний равишда қум-шағал қазиб олинаётганлиги аниқланди.
Натижада табиатга 10 млрд 369 млн 513 минг 728 сўм зарар етказилган.
Ҳолат юзасидан барча ҳужжатлар расмийлаштирилиб, 1 дона “ДООСАН 210” русумли экскаватор ва 1 та юк ташувчи транспорт воситаси жарима майдонига жойлаштирилди.
Ҳолат юзасидан тўпланган ҳужжатлар тегишли чора кўриш учун ҳуқуқни муҳофаза қилиш органларига юборилди.
Дарёлар ўзанларидаги норуда материалларни қазиб олишга муддатсиз мораторий жорий этилган
Президент фармони билан Чирчиқ, Сангзор, Зарафшон, Норин, Қашқадарё, Сурхондарё ва Сирдарё дарёлари ўзанларидаги норуда материалларни қазиб олишга 2024 йил 1 майдан муддатсиз мораторий жорий қилинди. Ноқонуний қазиб олиш ишлари натижасида табиатга етказилган зарар учун жавобгарлик ҳам кучайтирилди.
Шунга қарамай, ноқонуний қум-шағал қазиб олиш давом этмоқда. 12 февраль куни Сурхондарё ва Тошкент вилоятларида табиий қум хом ашёсини ўзбошимчалик билан қазиб олиш ҳолатлари фош этилди. Тошкент вилояти Бекобод туманида ноқонуний равишда қум қазиб олиниши оқибатида табиатга 100 миллиард сўмдан ортиқ зарар етказилди.
13 январда Самарқанднинг икки ҳудудида қум-шағал қазиб олиниши оқибатида табиатга 826 миллиард сўм зарар етказилганди.
Изоҳ (0)