Самарқанд вилоятининг Пахтачи туманида таркибида олтин моддаси бўлган тошларни ноқонуний кавлаб олаётган 5 киши заҳарланди. Бу ҳақда “Дарё”га Бош прокуратура ахборот хизмати раҳбари Ҳаёт Шамсутдинов хабар қилди.
Маълум қилинишича, 9 январь куни соат 20:00 ларда Пахтачи тумани “Гулистон” маҳалласида яшовчи беш киши — Ж.С., Ў.Э., С.Н., Ю.А. ва Э.Б. Пахтачи тумани “Қарнабота” МФЙ ҳудудида жойлашган “Қорақўтон” тоғ конига қарашли маҳаллий тил билан “Найман чуққи” шахтасига тушиб, генератор ва бошқа ускуналар ёрдамида таркибида олтин моддаси бўлган тошларни кавлаб олаётганида генератордан чиққан ис газидан заҳарланган.
Оқибатда уларнинг икки нафари — Ж.С. ва Ў.Э. шахта ичи пастки қисмига йиқилиб, шахта девори тошларига урилиб воқеа жойида вафот этган. Қолган фуқаролар ис газидан заҳарланиш билан 10 январь куни соат 03:30 ларда туман марказий шифохонасига келтирилган.
Ҳозирда, икки кишининг ўлими юзасидан судга оид тиббиёт экспертизаси тайинланган бўлиб, ҳолат юзасидан Пахтачи туман прокуратураси томонидан терговга қадар текширув ҳаракатлари олиб борилмоқда.
Олтинни ноқонуний қазиб олиш ҳолатлари
Бундан бир неча йил аввал Самарқанд вилояти Пахтачи туманида таркибида соф олтин моддаси бўлган руда тошларни талон-торож қилиш билан боғлиқ ҳолатлар тез-тез қайд этилади. Улар томонидан электр энергиясидан ноқонуний фойдаланиш ҳолатлари ҳам кузатилади.
Бунинг оқибати аянчли якунланган ҳолатлар ҳам талайгина. 2024 йил январида Навоийдаги олтин кони шахтасидан 30 ёшли эркакнинг жасади топилганди. У таркибида олтин моддаси бўлган маъданли тошларни талон-торож қилиш учун келган ва шахтадан чиқаётганида арқон узилиб кетиши оқибатида 10-15 метрлик пастликка тушиб кетиб, оғир тан жароҳати олиб вафот этган.
2022 йилда Навоийда олтинни ноқонуний ковлаб олишга уринган 5 кишини тупроқ босиб қолганди. Уларнинг жасади чуқурликда қарийб 2 ҳафта қолиб кетди. 2021 йилда Жиззахда олтин рудасини ноқонуний равишда қазиб олишга уринган тўрт кишини тош босиб қолганди. Уларнинг 2 нафари воқеа жойида вафот этган. Ўша йилда Зарафшонда тупроқ таркибидан тилла қумини ковлаб олаётган 4 киши қум остида қолиб ҳалок бўлган.
Изоҳ (0)