Швейцариянинг Ўзбекистондаги фавқулодда ва мухтор элчиси жиддий огоҳлантириш билан чиқмоқда, деб хабар берди Миграция агентлиги.
Унда айтилишича, шу кунларда Швейцариянинг Ўзбекистондаги элчихонасига ушбу давлатга сохта ишга таклиф қилиш ва қалбаки ишлаш рухсатномалари билан боғлиқ мурожаатлар кўпайган. Элчихона ва Миграция агентлиги фуқароларни бу ҳақда огоҳлантиришга қарор қилган.
“Хонимлар ва жаноблар, биз Швейцариянинг Тошкентдаги элчихонасида фирибгарликлар, жумладан, Швейцарияга ёлғон иш таклифлари ва “у ерда ишлашга”, деб берилаётган сохта ишлаш рухсатномалари ҳақида тез-тез эшитяпмиз. Шундай экан, Ўзбекистонда яшаб, Швейцарияда иш қидираётган бўлсангиз, фирибгарлик қурбони бўлиб қолишдан ўзингизни ҳимоя қилинг.
Агар сизга иш таклифи келиб тушса, жуда эҳтиёт бўлинг ва унинг чиндан ҳам ҳақиқийлигини текширинг. Иш таклифининг ҳақиқийлигини текшириш учун Швейцариядаги потенциал иш берувчи билан бевосита алоқада эканлигингизга ишонч ҳосил қилинг.
Эътибор беринг, фирибгарлар ўзларини компания вакили сифатида кўрсатишади ва компания ёки ҳатто, Швейцария расмийлари номидан сохта ҳужжатлар ясайди. Шунинг учун, Швейцарияда ишга олмоқчи бўлган компания билан тўғидан-тўғри мулоқот қилаётганингизни турли манбалардан фойдаланиб текширинг.
Жуда муҳим: ҳеч қандай шароитда пул тўламанг ёки ўтказманг! Агар иш таклифи ҳақиқий бўлса, ишлаш учун рухсатнома олиш иш берувчининг зиммасида бўлади. Иш визасини олиш учун Швейцариянинг Москвадаги элчихонасида жойлашган Минтақавий консуллик марказига шахсан ариза топширишингиз керак бўлади. Тошкентдаги элчихонага эмас!
Агар сиз ўзингизни бундай жиноят қурбони ёки фирибгарлар билан алоқада бўлдим, деб ҳисобласангиз, бу ҳақда маҳаллий ички ишлар органига хабар беришингизни тавсия қиламиз”, дейди Швейцариянинг Ўзбекистондаги фавқулодда ва мухтор элчиси Константин Оболенский.
Хорижда қонуний ва хавфсиз ишлашни мақсад қилганлар Миграция агентлиги ва унинг ҳудудий филиалларига ёки лицензияга эга Хусусий бандлик агентликларига мурожаат қилиши мумкин.
Ташқи ишлар вазирлиги матбуот котиби АҚШдаги ўзбекистонликларни огоҳлантирган эди. Келтирилишича, Ўзбекистоннинг Нью Йорк шаҳридаги Бош консулхонаси мурожаат билан чиққан. Унда 2020 йил 1 январдан бошлаб эски намунадаги паспортлар (нобиометрик) ўз кучини йўқотгани таъкидланган.
Изоҳ (0)