Shveysariyaning O‘zbekistondagi favqulodda va muxtor elchisi jiddiy ogohlantirish bilan chiqmoqda, deb xabar berdi Migratsiya agentligi.
Unda aytilishicha, shu kunlarda Shveysariyaning O‘zbekistondagi elchixonasiga ushbu davlatga soxta ishga taklif qilish va qalbaki ishlash ruxsatnomalari bilan bog‘liq murojaatlar ko‘paygan. Elchixona va Migratsiya agentligi fuqarolarni bu haqda ogohlantirishga qaror qilgan.
“Xonimlar va janoblar, biz Shveysariyaning Toshkentdagi elchixonasida firibgarliklar, jumladan, Shveysariyaga yolg‘on ish takliflari va “u yerda ishlashga”, deb berilayotgan soxta ishlash ruxsatnomalari haqida tez-tez eshityapmiz. Shunday ekan, O‘zbekistonda yashab, Shveysariyada ish qidirayotgan bo‘lsangiz, firibgarlik qurboni bo‘lib qolishdan o‘zingizni himoya qiling.
Agar sizga ish taklifi kelib tushsa, juda ehtiyot bo‘ling va uning chindan ham haqiqiyligini tekshiring. Ish taklifining haqiqiyligini tekshirish uchun Shveysariyadagi potensial ish beruvchi bilan bevosita aloqada ekanligingizga ishonch hosil qiling.
E’tibor bering, firibgarlar o‘zlarini kompaniya vakili sifatida ko‘rsatishadi va kompaniya yoki hatto, Shveysariya rasmiylari nomidan soxta hujjatlar yasaydi. Shuning uchun, Shveysariyada ishga olmoqchi bo‘lgan kompaniya bilan to‘g‘idan-to‘g‘ri muloqot qilayotganingizni turli manbalardan foydalanib tekshiring.
Juda muhim: hech qanday sharoitda pul to‘lamang yoki o‘tkazmang! Agar ish taklifi haqiqiy bo‘lsa, ishlash uchun ruxsatnoma olish ish beruvchining zimmasida bo‘ladi. Ish vizasini olish uchun Shveysariyaning Moskvadagi elchixonasida joylashgan Mintaqaviy konsullik markaziga shaxsan ariza topshirishingiz kerak bo‘ladi. Toshkentdagi elchixonaga emas!
Agar siz o‘zingizni bunday jinoyat qurboni yoki firibgarlar bilan aloqada bo‘ldim, deb hisoblasangiz, bu haqda mahalliy ichki ishlar organiga xabar berishingizni tavsiya qilamiz”, deydi Shveysariyaning O‘zbekistondagi favqulodda va muxtor elchisi Konstantin Obolenskiy.
Xorijda qonuniy va xavfsiz ishlashni maqsad qilganlar Migratsiya agentligi va uning hududiy filiallariga yoki litsenziyaga ega Xususiy bandlik agentliklariga murojaat qilishi mumkin.
Tashqi ishlar vazirligi matbuot kotibi AQSHdagi o‘zbekistonliklarni ogohlantirgan edi. Keltirilishicha, O‘zbekistonning Nyu York shahridagi Bosh konsulxonasi murojaat bilan chiqqan. Unda 2020-yil 1-yanvardan boshlab eski namunadagi pasportlar (nobiometrik) o‘z kuchini yo‘qotgani ta’kidlangan.
Izoh (0)