Якунланаётган ҳафта бошида Тошкентда ИИБ ходими бутун ўзбекистонликларни ҳақорат қилган бўлса, қашқадарёлик мансабдор ходимларини хўрлагани эшитилган аудиоёзув тарқалди. Наманган вилоятида эса туғуруқхонадаги абгор аҳвол тасвирланган видео чиқди. «Дарё» ҳафта якунида доимгидек ҳафтанинг энг шов-шувли воқеаларини эсга олади.
Фарғона вилоятида 64 ёшли қайнота аввалига келинини уриб, ҳушдан кетказди. Сўнгра унинг бошини узиб олиб, танасини ахлатхонага, бошини эса ўзи яшовчи ҳудуддаги фермер хўжалиги ерида яширган.
Бош прокуратура ахборот хизмати воқеа содир бўлганини тасдиқлади.
Мазкур ҳолат ҳақиқатан ҳам содир бўлган. Бу бўйича Жиноят кодексининг 97-моддаси (қасддан одам ўлдириш) билан жиноят иши қўзғатилган, — дейилади Бош прокуратура ахборот хизматининг расмий ахборотида.Ҳаёт Шамсутдинов «Дарё»га қўшимча қилиб, воқеа вилоятнинг Олтиариқ туманида содир бўлганини, воқеа юзасидан жиноят иши қўзғатилиб, гумонланувчи процессуал тартибда ушланганини очиқлади.
Мазкур ҳафтада ижтимоий тармоқларда Наманган вилоятининг Чортоқ туманидаги туғуруқхона тасвирланган видео тарқалди. Видеода туғуруқ жараёнини ўтказган 15 нафарга яқин аёл ва болалар бир хонада ётганини кўриш мумкин.
Вазиятни бориб ўрганган «Дарё» мухбири билан суҳбатлашган Чортоқ туман тиббиёт бирлашмаси туғуруқхона бўлими мудири Ҳамида Обидова бўлимда 50 та ўрин мавжудлигини, видео тарқалган куни эса туғиш жараёнидаги аёллар сони 90 нафардан ошиқ бўлганини айтмоқда. Айни пайтда эса уларнинг сони 72 нафар, яъни барибир қўшимча 22 та ўринга эҳтиёж бор.
Тўлғоқ тутган аёллар сони қачон кўпайиб, қачон камайишини тахмин қилиш имконсиз нарса. Баъзан палаталаримизда койкалар бўшаб қолган кунлар ҳам бўлади. Олдинлари, аниқроғи, ўтган асрнинг 80-90 йилларида Чортоқ туманида туғиш ёшидаги аёллар сони ўрача 25 минг нафар, туғуруқхонадаги ўринларимиз сони эса 160 та бўлган. Ҳозир туғиш ёшидаги аёллар сони 55 мингга етди, койкаларимиз эса қисқартирилиб, 50 тага тушиб қолди. Шу сабабли бундай мушкул вазиятга дуч келяпмиз, — дейди Ҳамида Обидова.Тошкент вилояти ҳокими Зоир Мирзаев фуқаролар учун бўлиб ўтган навбатдаги қабулида фуқароларга мурожаат қилиб, ҳамма ўз ҳудуди бўйича масъулларга, хусусан ҳокимларга мурожаат қилиши кераклигини, агар муаммоси ҳудуд ҳокимлари орқали ҳал бўлмаса кейин унинг қабулида бўлишлари кераклигини айтди.
Мана Олмалиқ ва Оҳангарон шаҳри, Оҳангарон тумани ҳокими ҳам бор, аввал уларга мурожаат қилинг, ҳал бўлмаса менга келинг, — деди Зоир Мирзаев унинг қабулида навбатда турган мурожаатчиларга.Бунга жавобан Оҳангарон тумани ҳокими Абдурасул Абдуллаев «Шундай мурожаатлар борки, мурожаатчи менга биринчи маротаба келган пайтда, ўн дақиқада ҳал бўлади. Бу мурожаат қонуний бўлиб, уни қонунан ҳал қилиш имконияти бизда бор.
Иккинчи тоифадаги мурожаатлар шундай муаммоки, уларнинг ечими маблағга бориб тақалади. Бу маблағга туман бюджетининг қурби етмайди. Шу тоифадаги мурожаатчилар вилоятдан кўпроқ пул олиш мақсадида вилоят ҳокими қабулига келяпти. Яна шундай мурожаатчилар борки, уларнинг муаммосини нафақат туман, балки вилоят ҳам ҳал қилолмайди. Боиси унинг талаби ноқонуний.
Масалан, менга уй беринг деб келади. Қонуний томондан олиб қаралса, унга у бериш нотўғри, Низом талабига тўғри келмайди. Шу тоифадаги фуқаролар вилоят ҳокими, шунингдек, республика даражасидаги ташкилотларга бориб, мана туман ҳокими мурожаатимни ҳал этмаяпти дейди. Энди хулоса ўзингизга», деди.
Мазкур ҳафтада шунингдек, Қорақалпоғистоннинг танқидчи раҳбари Аманбай Ўринбаев 7 нафар ҳокимни огоҳлантирди. Аманбай Ўринбаев янги иш ўринларини яратиш ва аҳоли бандлигини таъминлаш соҳасида қилинаётган ишлар талаб даражасида эмаслигини айтиб, масъулларни кескин танқид қилган.
Изоҳ (0)