Тошкент вилояти Чиноз туманида 25 ёшли эркак хотини ва қайнанасини ўлдирди. Бу ҳақда Бош прокуратура хабар берди.
Билдирилишича, Бош прокуратура томонидан жорий йилнинг 19 март куни фуқаро А.Қ. бирга яшаб келган Ф.Р. ҳамда қайнонаси М.Ш.ни қасддан ўлдиргани юзасидан Жиноят кодексининг 97-моддаси 2-қисми билан жиноий иш қўзғатилган.
Жиноят ишининг содир этилиши сабаблари ва унга имкон берган шарт-шароитлар Чиноз тумани прокурори, туман ИИБ бошлиғи ва ҳодиса содир бўлган тумандаги “Обиҳаёт” маҳалласи масъуллари иштирокида кўриб чиқилди. Қотилликка қўл урган А.Қ. билан суҳбатлашилиб, жиноятга оид тафсилотларга ойдинлик киритилди.
Учрашувда маҳалла еттилиги томонидан ҳудудда жиноятчиликнинг олдини олиш бўйича амалга оширилган ишлар танқидий муҳокама қилинди. Шунингдек, ушбу қотиллик жиноятининг тергови давомида барча масъул ходимларнинг фаолияти бўйича идоравий хизмат текшируви ўтказилиб, айбдор шахсларнинг жавобгарлик масаласи қонун доирасида ҳал этилиши таъкидланди.
Учрашув сўнгида маҳаллада келгусида шу каби ҳолатлар такроран қайд этилишининг олдини олиш бўйича тегишли чора-тадбирлар белгиланди.
Шу билан бирга, жиноят иши ҳужжатлари ўрганилиб, ҳодиса содир бўлган жой қўшимча кўздан кечирилди ҳамда жиноят иши тергови давомида эътибор қаратилиши лозим бўлган масалалар юзасидан масъул ходимларга тегишли кўрсатмалар берилди.
Мазкур туманда 14 февраль куни ука ўз опасини ўлдириб, 7 кун уйда сақлаган эди.
Пичоқлаш билан якунланган оилавий жанжаллар
Сурхондарё вилоятида эркак қайнукаси томонидан, Самарқандда 70 ёшли эркак 60 ёшли қайнукаси томонидан пичоқланганди. Бухорода эр жанжал сабаб хотинини пичоқлагани, Жиззахда эр рашк сабаб аввал хотинини, кейин эса ўзини пичоқлаб ўлдиргани, Вобкент туманида маст фуқаро қайнукасини пичоқлагани тўғрисида хабар берилганди.
Изоҳ (0)