Буюк Британияда 30 июль куни мусулмонларга қарши намойиш уюштирган фуқаролар ҳаракати полиция иштирокидаги оммавий тўқнашувларга айланиб кетди. Бу ҳақда Reuters нашри хабар берди.
Манбада айтилишича, кескинлик 29 июль куни Саутпорт шаҳрида юз берган қотиллик оқибатида келиб чиққан. Бу шаҳарчада ўтказилган концерт пайтида номаълум ўспирин жиноят содир этиб, уч нафар болани пичоқлаб ўлдирган, яна беш нафар бола оғир жароҳат билан касалхонага олиб кетилган.
Саутпорт аҳолиси қотилликда мусулмон жамоасидан гумон қилган. Ўлдирилган болаларнинг қариндошлари ҳамда уларга қўшилганлар иштирокидаги норозилик ҳаракатлари тартибсизликларга айланиб кетган.
Намойишчилар дастлаб кўчадаги мусулмон аҳоли вакилларига нисбатан зўравонликлар содир этган. Кейинчалик Саутпортдаги масжидга ҳужум қилган.
Британия расмийлари мусулмонларга қарши намойишларни “Англия мудофаа лигаси” ташкилоти қўллаб-қувватлагани ва ташкил этишда ёрдам берганини маълум қилган. Ушбу ташкилот миллий сиёсат юритишни талаб қилади ҳамда Британияни ўзгача дин ва миллат вакилларидан “тозалаш”ни даъво қилиб келади.
Намойишчиларни тўхтатиш учун полиция сафарбар қилиниши норозилик кўламини баттар ошириб юборган. Фуқаролар полиция машиналарига ҳужум қилган, ходимларга шикаст етказилган. Марказий кўчаларда кўплаб автомобиллар ёқиб юборилган. Намойишчилар “Биз ватанимизни қайтаришни хоҳлаймиз” деб ёзилган шиорлар кўтариб шаҳарда марш ташкил этган.
Намойишчиларга махсус мурожаат эълон қилган полиция департаменти қотиллик содир этган шахс мусулмон жамоасидан эмаслигини маълум қилган. Ушбу жиноятни содир этишда гумонланган 17 ёшли шотланд миллатига мансуб Буюк Британия фуқароси ҳибсга олингани айтилган.
Полиция намойишчилардан асоссиз маълумотларга ишониб ҳаракат қилмаслик ҳамда ўзга дин вакилларига нисбатан ҳужум содир этмасликни сўраган. Расмийлар тегишли тергов тадбирлари ўтказаётгани, айбдорлар қонун доирасида жазога тортилиши ваъда қилинган.
Полиция жиноятда айблаб ҳибсга олинган ўсмирнинг исмини ошкор қилмаган. У бу ишга нима учун қўл ургани ҳам ҳозирча номаълум.
Изоҳ (0)