Toshkent viloyati Chinoz tumanida 25 yoshli erkak xotini va qaynanasini o‘ldirdi. Bu haqda Bosh prokuratura xabar berdi.
Bildirilishicha, Bosh prokuratura tomonidan joriy yilning 19-mart kuni fuqaro A.Q. birga yashab kelgan F.R. hamda qaynonasi M.Sh.ni qasddan o‘ldirgani yuzasidan Jinoyat kodeksining 97-moddasi 2-qismi bilan jinoiy ish qo‘zg‘atilgan.
Jinoyat ishining sodir etilishi sabablari va unga imkon bergan shart-sharoitlar Chinoz tumani prokurori, tuman IIB boshlig‘i va hodisa sodir bo‘lgan tumandagi “Obihayot” mahallasi mas’ullari ishtirokida ko‘rib chiqildi. Qotillikka qo‘l urgan A.Q. bilan suhbatlashilib, jinoyatga oid tafsilotlarga oydinlik kiritildi.
Uchrashuvda mahalla yettiligi tomonidan hududda jinoyatchilikning oldini olish bo‘yicha amalga oshirilgan ishlar tanqidiy muhokama qilindi. Shuningdek, ushbu qotillik jinoyatining tergovi davomida barcha mas’ul xodimlarning faoliyati bo‘yicha idoraviy xizmat tekshiruvi o‘tkazilib, aybdor shaxslarning javobgarlik masalasi qonun doirasida hal etilishi ta’kidlandi.
Uchrashuv so‘ngida mahallada kelgusida shu kabi holatlar takroran qayd etilishining oldini olish bo‘yicha tegishli chora-tadbirlar belgilandi.
Shu bilan birga, jinoyat ishi hujjatlari o‘rganilib, hodisa sodir bo‘lgan joy qo‘shimcha ko‘zdan kechirildi hamda jinoyat ishi tergovi davomida e’tibor qaratilishi lozim bo‘lgan masalalar yuzasidan mas’ul xodimlarga tegishli ko‘rsatmalar berildi.
Mazkur tumanda 14-fevral kuni uka o‘z opasini o‘ldirib, 7 kun uyda saqlagan edi.
Pichoqlash bilan yakunlangan oilaviy janjallar
Surxondaryo viloyatida erkak qaynukasi tomonidan, Samarqandda 70 yoshli erkak 60 yoshli qaynukasi tomonidan pichoqlangandi. Buxoroda er janjal sabab xotinini pichoqlagani, Jizzaxda er rashk sabab avval xotinini, keyin esa o‘zini pichoqlab o‘ldirgani, Vobkent tumanida mast fuqaro qaynukasini pichoqlagani to‘g‘risida xabar berilgandi.
Izoh (0)