Тошкентда 3 ёшли болани шафқатсизларча пичоқлаб ўлдирган шахс 24 йилга қамалди (видео)

Жиноят ишлари бўйича Мирзо Улуғбек туман судида 2024 йилнинг 8 июлидан 9 июлига ўтар кечаси соат тахминан 01:00 ларда Тошкент шаҳрининг Яшнобод туманида содир этилган мудҳиш қотиллик — 3 ёшли болани ваҳшийларча ўлдирган 31 ёшли фуқаро иши кўрилаётгани хабар берилганди. Суднинг 29 ноябрь куни давом этган навбатдаги мажлисида судланувчига ҳукм ўқилди. 

Суд муҳокамасида сўз олган прокурор марҳум бола қотиллигида гумонланган шахсга бир умрлик озодликдан маҳрум қилиш жазоси тайинланишини сўради.

Судланувчи 3 ёшли бола қотили деб топилди ва унга 24 йил муддатга озодликдан маҳрум қилиш жазоси тайинланди. 

Судда аниқлаштирилишича, 2024 йилнинг 9 июль куни Яшнобод туманидаги кўп қаватли уйда ижара асосида яшаб келаётган 31 ёшли эркак ушбу манзилда қонуний никоҳдан ўтмасдан яшаб келган аёли билан низолашиб, унинг биринчи турмушидан туғилган ўғил фарзандига пичоқ билан тан жароҳатлари етказиб, ҳодиса жойидан яширинган. Бола шифохонага етмай, вафот этган.

Суднинг дастлабки мажлисларида сўз олган жабрланувчи аёл, марҳум боланинг онаси Н.Н. боласининг қотили деб топилган эри билан қотиллик воқеасидан бир кун аввал уришиб қолиб, уйига кетиб қолганини, эри онасига ялиниб уларни уйга қайтарганини айтганди.

Мен яшамайман деб кетиб қолгандим. Кейин у онамга телефон қилиб, “бир оналик қилинг, охирги марта бўлди, энди ҳеч қачон қизингизни хафа қилмайман” деб ёлвориб, онамни кўндирган ва бизнинг уйга қайтиб келишимизга сабабчи бўлганди. Ярим кечаси бирларда мен уйга қайтиб келдим. Эртаси куни эрталаб кир ювиб юрган пайтим болам балконда ухлаётганди. Шу пайт залда орқамга ўгирилганимда у боламнинг ёнига кириб, боламни чап қўлида бўғди. Югуриб бориб ундан боламни олгунимча пичоқ тиқиб ташлади. Боламни олишга уринганимда мени ҳам урди. Пичоқни олиб боламни ололмаганимдан кейин мен кўчага югурдим. Югурганимдан кейин у менинг орқамдан югуриб, болани ташлади. Унгача боламни унинг қўлидан олишга кучим етмади. Кўчага чиқиб, ёрдам беринг деб бақирдим. Қўшнилар бақир-чақирни эшитгач, 102 га хабар қилишган экан. Кейин бир неча ходимлар келиб, олиб кетишди. Ҳеч қандай уруш бўлгани йўқ эди, шунчаки бизлар қайтиб келгандик. Кечиринг деб яшай бошлагандим, деганди аёл қотиллик воқеаси рўй берган вақтни ёдга олар экан.

Марҳум боланинг отаси нафақат судланувчи собиқ аёли, боланинг онаси Н.Н. ҳам психотроп ва наркотик моддалар истеъмол қилиб келганини, боласига эътиборсиз бўлганини айтиб, суддан аёлга ҳам чора кўришни сўраганди.

Ҳозир ҳам экспертизага олиб борсангиз чиқади. Мен буни билиб юрардим. Таниш-билишлар айтиб беришарди. Бунинг ҳеч қайси гапига ишониш керак эмас. Бир марта боламни кўришга борганимда болам уйда битта ўзи ўйнаб юрганди. Уйда ҳеч ким йўқ, кўчанинг эшиги очиқ эди. Кириб бунинг ухлаб ётганини кўрдим. Кайфдан қотиб қолган. Юзига уриб, тур десам ҳам турмаган. Кейин болани олиб кетганман. Олиб кетганимда 102 га қўнғироқ қилиб, ўғлимни олиб кетаётганимни, эртага ўғирлаб кетди деганда ўзимни ҳимоялаш учун айтаётганимни билдирганман. Бола меникида яхши яшаб юрганди. У ялиниб узр сўраб, “боламни бер, яшай олмайман, ўлиб қоламан”, дегани учун, қолаверса уйда қарашга одам бўлмагани учун қайтариб бергандим. Она болага жавобгарда, шу сабаб бунга ҳам чора кўринг, деганди жабрланувчи.

Судда сўз олган гувоҳлар, ИИБ ходимлари қотиллик воқеаси содир бўлган пайтда ўша хонадонга етиб боришганида болани қонга беланиб ётган ҳолда кўришганини, қотиллик воқеаси шафқатсизларча амалга оширилганини гапириб берганди. 

“Эсимда йўқ, кўп кайф қилиб юборганман. ‘Гулук’да бўлганман, ҳамма билади. Кечиринглар”, дея қотиллиги ҳақида гапирганди судланувчи. Унинг сўзларига “судланувчи ичимга жин кириб қолди, болани ўлдиришимни буюрди, деяпти”, дея адвокати изоҳ берганди.

Республика руҳий касалликлар шифохонасидан келган психолог-экспертлар судланувчининг билиш жараёнларида яққол ифодаланган бузилиш жараёнлари аниқланмаганини айтиб, “Фикрлари кетма-кетликда. Индивидуал психологик хусусиятларга кўра, ўз-ўзини оқлаш тенденциясининг юқорилиги, эгоцентризм каби хусусиятлар аниқланди. Текширилувчи ижтимоий хавфли қилмиш содир этган вақтда физиологик аффект ҳолатида бўлмаган”, деганди.