АҚШда сохта гувоҳлик ортидан одам ўлдиришда айбланиб, 43 йил қамоқда ўтирган аёл озодликка чиқарилди. Бу ҳақда BBC нашри хабар берди.
Манбада айтилишича, Сандра Ҳемме ярим асрга яқин қамоқ жазосини ўтагач, суд томонидан оқланиб озодликка чиқарилган. У 1980 йилнинг ноябрь ойида Миссури штатидаги Сент Жозеф шаҳрида кутубхона ходими бўлган Патрисия Ешке исмли шахсни пичоқлаб ўлдирганликда айбдор деб топилиб, умрбод қамоқ жазосига ҳукм қилинган.
Сандра озодликдан маҳрум қилинганда 20 ёшда бўлган. Ҳозирда эса у 64 ёшни қаршиламоқда. Собиқ маҳкуманинг жиноят иши мамлакат оммавий ахборот воситаларида кенг муҳокамаларга сабаб бўлган. Айнан журналистик сўровлар ва Сандра Ҳемменинг такрор ва такрор апеллациялари судни жиноят ишини қайта кўриб чиқишга мажбур қилган.
Хабарда айтилишича, дастлаб Сандра Ҳемменинг жиноятга алоқадорлигини тасдиқловчи ҳеч қандай далил бўлмаган. Кейинчалик у психиатрия шифохонасида ўткир тинчлантирувчи дори таъсири остида жиноятни содир этганини айтган. Ушбу иқрорлик эса унга умрбод озодликдан маҳрум қилиш жазоси тайинланишига олиб келган.
Ўтмишдаги жиноий ишни қайта кўриб чиққан терговчилар кўздан қочирилган маълумотларни аниқлаган. Сўнгги топилган далиллар қотилликни содир этган шахс сифатида Майкл Ҳолман исмли шахсга ишора қилган.
Гумондор Ҳолман маҳаллий полиция офицери бўлган. Кутубхона ходими Патрисия Ешке ўлдириб кетилган уй ёнида офицернинг машинаси топилган. Қотилликдан бир неча кун ўтиб Ҳолман ўлдирилган Патрисиянинг кредит картасидан фойдаланган. Терговчилар, шунингдек, офицернинг уйидаги тинтув пайтида марҳумага тегишли тилла зиракларни ҳам топган. Воқеанинг сирли жиҳати шуки, на терговчилар ва на тергов ишида қатнашган бошқа шахслар бу далилларни судга тақдим этмаган.
Офицер Ҳолман кейинчалик талончилик жиноятлари содир этишда ҳам айбланган. У 2015 йилда вафот этгач, у билан боғлиқ терговлар ҳам тўхтатилган. 2023 йил охирида эса бу иш яна кўтарилиб, Сандра оқлангунга қадар давом этган.
Сандра Ҳемме узоқ йиллик маҳкумликдан сўнг 19 июль куни қамоқхонани тарк этди. У Канзасдаги синглиси билан яшашга қарор қилган. Озодликка чиққанидан кейин яқин атрофдаги боғда оиласи билан учрашган, қизи ва набирасини яна бағрига босган.
Изоҳ (0)