Ўзбекистон тарихи давлат музейида гендер мавзуси ва жамиятда зўравонликни рад этиш бўйича ўтказилаётган халқаро конференцияга бағишланган 17 Faces of Action («Матонатнинг 17 қиёфаси») фотокўргазмаси бўлиб ўтади.
Ғоя муаллифи — Президент администрацияси Ижро этувчи аппаратининг коммуникациялар ва ахборот сиёсати сектори мудири Саида Мирзиёева. Тадбир Миллий масс-медиани қўллаб-қувватлаш ва ривожлантириш жамоат фонди томонидан ташкил этилмоқда.
Кўргазма БМТнинг Женева бўлими бош директори Татяна Валова – тарихда бу лавозимни эгаллаган биринчи аёл ҳамда Швейцария Аёлларининг ўзаро ёрдам уюшмаси (ASWE) ташаббуси билан ўтказилмоқда. Тадбир бугунги кунда аёлларнинг роли, уларнинг эркаклар билан бир қаторда жамиятда янги, янада адолатли, фаровон ҳаётни барпо этиб, барқарор ривожланиш мақсадларига эришишга хизмат қилаётганликларини кўрсатишга қаратилган.
Барқарор ривожланиш мақсадлари – БМТ томонидан 2015 йилда барча учун янада яхши ва барқарор келажакка эришиш режаси» сифатида ишлаб чиқилган 17 та глобал мақсад тўпламидир. Ушбу мақсадлар Бош ассамблеянинг «2030 йилгача бўлган даврда кун тартиби» резолюциясида қайд этилган.
БМТга аъзо мамлакатлар билан бирга лойиҳа амалга ошириш: ҳар бир мамлакатдан барқарор ривожланиш мақсадларини ўзида мужассамлаштирган 17 та аёлни танлаб, кўргазма ташкил қилиш ҳақида ғоя пайдо бўлди. 17 та барқарор ривожланиш мақсадлари – бу бизни ўйлантираётган ҳамма нарса: қашшоқликка қарши кураш, муносиб таълим олиш ва меҳнат қилиш, атроф ва сув муҳитини ҳимоя қилиш, инсон ҳуқуқлари, тинч яшаш ҳуқуқи ва шу каби бошқа мақсадларни ўз ичига олади. Буларнинг барчасига эришишда 17-мақсад – ҳамкорлик қилиш мақсади бор. Барқарор ривожланиш мақсадлари Ташкилотга аъзо бўлган барча давлатлардан келаётган ҳаракатларга ўзига хос чақириқдир, — дейди БМТнинг Женева бўлими бош директори Татяна Валова ғоянинг пайдо бўлиши ҳақида гапириб.Бундай кўргазма илк маротаба Озарбайжонда ўтказилган эди. Ўзбекистон мазкур лойиҳа ўзининг амалий ифодасини топган дунёдаги иккинчи мамлакат бўлди.
Экспозиция икки блокда намойиш этилади. Уларнинг асосийси келажакни янада гўзал, адолатли ва меҳр-оқибатли қилиш йўлида ўз ҳаёти ва бор куч-ғайратини умумий фаровонликка бағишлаган Ўзбекистон аёлларига бағишланади.
Улар ҳеч бир тўсиқлардан қўрқмай, ўзларининг чексиз салоҳиятга эга экани, ҳар қандай соҳада юксак натижаларни қўлга киритибгина қолмай, инсонлар меҳрини забт этиб, ўзларига эргаштира олишларини дунёга кўрсатган аёллардир.
Қаҳрамонлар орасида тиббиёт, қишлоқ хўжалиги, экология, институционал ривожланиш соҳасидаги олималар, аёллар ҳуқуқлари ҳимоячилари, аёл иқтисодчилар, спортчилар, IT-технологиялар соҳасидаги мутахассислар ва бошқа истеъдодлар бор.
Кўргазма ташкилотчилари тадбир, ушбу кўзга кўринган аёлларга ҳурмат ва уларнинг хизмати, жамиятдаги ижобий таъсирига бўлган миннатдорчилик бўлибгина қолмай, балки кўплаб аёлларнинг ҳаётнинг турли соҳаларига ҳақиқий ижобий таъсирини англашга ҳам ёрдам беради, деган умидда. Ушбу намойиш орқали аёллар БМТнинг барқарор ривожланиш соҳасидаги 17 та мақсаднинг элчиси бўлади.
Кўргазманинг иккинчи қисми БМТ томонидан тақдим этилган «Миллатлар саройи: мулоҳаза учун вақт» деб номланади. Классик оқ-қора услубдаги фотосуратларда ковид пандемиясининг энг оғир даврлари кўрсатиб берилади. Миллатлар саройи томошабинлар кўз ўнггида кимсасиз ҳолатда пайдо бўлади.
Бу ишлар «Матонатнинг 17 қиёфаси» Халқаро лойиҳасига ҳамроҳ бўлиб, у амалга ошириладиган барча мамлакатларда умид, барқарорлик ва ҳар бир қийинчиликдан сўнг енгиллик борлигини англаш рамзи сифатида ўтказилади. Лойиҳа якунлангач, улар Женевага қайтади. Миллатлар саройидаги якуний фотокўргазмада бутун дунё тараққиётига ҳисса қўшаётган аёлларнинг ўнлаб портретлари намойиш этилади.
Изоҳ (0)