Ўзбекистонда ижобий кредит тарихига эга бўлган хотин-қизларга 100 миллион сўмгача гаровсиз кредит ажратилади. Бу ҳақда “Оила ва хотин-қизларни қўллаб-қувватлаш тизимини янада такомиллаштириш чора-тадбирлари тўғрисида”ги президент қарорида белгиланди.
Қарорга кўра, ушбу гаровсиз кредит “Ҳамроҳ” тадбиркор аёлларни қўллаб-қувватлаш дастури доирасида 2025 йил 1 майдан бошлаб ижобий кредит тарихига эга бўлган хотин-қизларга ажратилади.
Шу санадан хотин-қизларга “яшил лойиҳалар” ва IT соҳасидаги лойиҳаларни амалга оширишига, шунингдек, камида 5 нафар хотин-қизнинг тадбиркорлигини йўлга қўйишга кўмаклашган 1 минг нафар “устоз” тадбиркорларга 50 миллион сўмгача грант ажратилади.
Аёл тадбиркорлар томонидан кредит ҳисобидан сотиб олинаётган асбоб-ускуналар етказиб берилгунга қадар “Тадбиркорликни ривожлантириш компанияси” АЖ томонидан кафиллик тақдим этилиши йўлга қўйилади.
2025 йилда хотин-қизларни қўллаб-қувватлашнинг асосий мақсадли кўрсаткичлари этиб қуйидагилар белгиланди:
- 2 миллион нафар хотин-қизларнинг бандлигини таъминлаш;
- 250 минг нафар хотин-қизларни касб-ҳунар ва тадбиркорликка ўқитиш;
- 250 минг нафар хотин-қизларни олий таълим билан қамраб олиш;
- 50 минг нафар эҳтиёжманд хотин-қизларни санаторийларда соғломлаштириш ҳамда уларда тадбиркорлик кўникмаларини шакллантириш бўйича мотивацион семинарлар ташкил этиш.
Ўзбекистонда кредитини вақтида тўлаган аёл тадбиркорларга 100 миллион сўмгача гаровсиз кредит берилиши ҳақида 7 март куни Кўксарой қароргоҳида Халқаро хотин-қизлар куни муносабати билан ўтказилган тадбирда маълум қилинганди.
“Ўтган йили ташкил этилган “Ҳамроҳ” компанияси янги тизим асосида Тадбиркор аёлларни қўллаб-қувватлаш дастурини бошлаган эди. Бу лойиҳага ҳам 100 миллион доллар ажратганмиз. Кредитини вақтида тўлаган аёл тадбиркорларга ушбу дастур доирасида 100 миллион сўмгача гаровсиз кредит беришни бошлаймиз”, деган эди президент.
Давлат раҳбари 2025 йилда касб-ҳунарга ўқитиш, ишли қилиш ва тадбиркорликни ривожлантириш ҳисобидан 2 миллион нафар аёлнинг бандлигини таъминлаш мақсад қилинганини қайд этиб ўтганди.
Президент тадбиркорликни ҳар томонлама қўллаб-қувватлаш бўйича 2024 йил якунлари ва 2025 йилга асосий режалар юзасидан видеоселектор йиғилишида “чемпион” тадбиркорларни кўпайтириш кераклигини айтганди.
Изоҳ (0)