Баъзида актёрлар ўз қаҳрамонларининг лойиҳадан четлатилишидан норози бўлса, баъзиларни бу чинакамига ғазаблантирган.
Стив Бушеми — “Сопрано”
90 йилларнинг охиригача бўлган бутун фаолияти давомида Стив Бушеми “Фарго”, “Қутурган итлар”, “Катта Лебовски”, “Армагеддон” ва бошқа бир қанча фильмларда рол ўйнаган. “Сопрано” эса унинг ўзи учун катта ва аҳамиятли деб билган биринчи асари бўлди. Айнан шунинг учун ҳам у қаҳрамони — Тони Бландеттони бахтсиз ҳодиса кутаётганини билгач, қаттиқ хафа бўлди. Стивнинг ўзи айтганидек, у “жуда, жуда хафа бўлган” ва ўшанда у ўзининг энг яхши ишини қўлдан бой берди, деб ҳисоблаган.
Дарвоқе, аслида Стив учун яна бир муваффақият ҳали олдинда эди, чунки бир неча йил ўтгач, у яна бир гангстер сериали — “Яширин империя”да бош ролни олди. Эътиборлиси, Тони Бландеттонинг тақдиридан “Сопрано” муаллифи Девид Чейз ҳам ҳафсаласи пир бўлган. Ўша пайтда уни ҳикоядан олиб ташлаш қарори унга ягона тўғри қарор бўлиб туюлди, аммо вақт ўтгач, у бу хато эканлигини тушунди.
Эйдан Гиллен — “Тахтлар ўйини”
Вариснинг якуний саҳнаси томошабинларда салбий муносабат уйғотган бўлса-да, бу улар учун кутилмаган ҳодиса бўлмади. Чунки олдинги мавсумда ҳам сценарий муаллифлари Петир Бэйлиш билан шундай муваффақиятсиз тарзда хайрлашган эди. Гарчи сўнгги саҳна Эйдан Гилленни хафа қилган бўлса-да, у бундан умидсизликка тушмади, аксинча шоу-раннерлар тўғри йўл тутганини таъкидлади.
Эйдан мухлисларнинг муносабатидан хабардор бўлиб, уларнинг танқидини “жирканч” деб атади ва Бэйлишнинг тақдири “ягона мумкин бўлган йўсинда” якунланганини айтди. Шуни таъкидлаш жоизки, бу фикрда ҳақиқат бор — Петир албатта бир кун келиб ўз қилмишлари учун жавоб бериши муқаррар эди. У жуда кўп ёмонликлар қилиб, кўплаб душманлар орттирган эди. Бироқ сценарий муаллифлари бу якунга Варис билан бўлгани каби шошма-шошарлик билан ёндашдилар.
Метт Линз — “Юрувчи мурдалар”
Чандлер Риггс кетганидан сўнг, шоу-раннер ҳам алмашди — Скотт Гимпл ўрнига Анжела Канг келди. У дарҳол сериалдаги муҳитни ўзгартирди, биринчи марта қишни тасвирлади ва Карлнинг нусхасини ривожлантирди. Эҳтимол, у Гимпл бош актёрларидан бирига қилган муомаласи туфайли сериалдан норози бўлган мухлисларнинг содиқлигини қайтаришга умид қилгандир. Унинг ўрнига Генри ролини ижро этган Метт Линз майдонга тушди. Бу етакчилик қобилиятига эга бўлган жуда ёқимли персонаж эди, бундан ташқари, у сезиларли даражада узоқ экран вақтига эга эди.
Аммо тўққизинчи мавсумнинг сўнгги қисмидан олдинги қисмида у кутилмаганда тўққизта бошқа ижобий персонаж билан бирга сериални тарк этди. Метт ўз қаҳрамонининг тақдиридан хабар топиб, афсусланганини билдирди ва Генри яхши бош қаҳрамон бўлиши ҳамда яна кўплаб қизиқарли воқеаларни ҳикоя қилиши мумкинлигини таъкидлади. Бироқ Анжела Канг бошқача қарор қабул қилди ва эски персонажларга эътиборини қаратди.
Лори Holden — “Юрувчи мурдалар”
Андреанинг сериалдан кетиши Лори Holden учун икки сабабга кўра кутилмаган ҳодиса бўлди: биринчидан, комиксларда Андреа асосий қаҳрамонлардан бирига айланиши ва кейинги воқеаларга катта таъсир кўрсатиши керак эди, иккинчидан эса, у саккиз йиллик шартнома имзолаган эди. Бироқ шартномада бўшлиқ бўлган, бу эса сериал яратувчиларига уч йилдан сўнг актриса билан хайрлашиш ва уни ҳайратда қолдириш имконини берди.
Чунки Holden айнан ўша пайтда суратга олишлар учун узоқ парвозларни қилмаслик ва уйдан узоққа кетмаслик мақсадида Атлантадан уй сотиб олаётган эди. Охир-оқибат, Holden ўз қаҳрамони финалини “мутлақо бемаъни” деб атади ва у билан хайрлашган куни суратга олиш майдончаси “кўз ёшларга тўлганини” таъкидлади.
Марк Шеппард — “Ғайритабиий”
Кроули “Ғайритабиий” сериалининг энг қизиқарли қаҳрамонларидан бири эди. Унинг чиқариб юборилиши ҳам сериалга, ҳам ролни ижро этган Марк Шеппардга қаттиқ зарба бўлди. Марк сўнгги мавсумларда ўз қаҳрамони тақдиридан кўнгли тўлмаганини айтган, якуний қисм эса унинг учун яна бир афсусланишга сабаб бўлди.
Тез орада “Ғайритабиий” сериалининг ижрочи продюсерларидан бири Жим Майкл мухлисларга келажакда Марк қайтиши мумкинлиги ҳақида умид берди. Бироқ Шеппард унга кескин жавоб қайтариб, мухлисларни чалғитаётганини ва унинг қайтиши ҳақида ҳеч кимда ҳеч қандай фикр йўқлигини таъкидлади. Эътиборли жиҳати шундаки, Маркни ҳақиқатан ҳам сериал финалига таклиф қилишган, аммо у эски гина туфайли бу таклифни рад этган.
Жо Понтолиано — “Сопрано”
“Сопрано” сериалидаги Ралфнинг тақдири кутилган бўлса-да, бу Жо Пантолианони ҳайратда қолдирди. Сценарийни ўқиш пайтида Жо ўз қаҳрамонининг сўнгги саҳнасини кўриб, ўрнидан сакраб турди, сценарий муаллифларига баланд овозда ғазаб билан нимадир деб бақирди ва агенти билан гаплашиш учун телефонини қулоғига тутганча хонадан отилиб чиқди. Ушбу воқеага гувоҳ бўлган актёрлардан бири айтишича, Поли ролини ижро этган Тони Сирико қочиб кетаётган Жонинг ортидан ҳазиломуз тарзда: “Чиқиб кетаётганда эшик сени уриб юбормасин”, деб қичқирган экан.
Ен Битти — “Тахтлар ўйини”
Ен Битти кўпинча салбий қаҳрамонлар ёки антиқаҳрамонларни ижро этса-да, аслида, у жуда таъсирчан одам эканлигини Мерин Трантнинг тақдири ҳақидаги муносабатидан билса бўлади. Саҳналардан бирида Аря Трантга иложи борича яқинлашиб, ўзига хос тарзда адолатни ўрнатади. Битти бу саҳнани суратга олиш пайтида йиғлаганини тан олган, аммо бахтига, ҳеч ким буни сезмаган, чунки унинг кўзлари протезлар билан ёпиқ бўлган.
Изоҳ (0)