Баҳор келиши билан ҳаммада мотивация ва илҳом пайдо бўлади. Агар ҳаётингизга янада ёрқинроқ таассуротлар қўшмоқчи бўлсангиз, бу янги сериаллар рўйхати айнан сиз учун. Уларнинг баъзилари март ойида эфирга узатилади, баъзилари эса фақат шу мавсумда намойиш этилиши кутилмоқда.
“Гангстерленд”
Шу ой охиридаги энг ёрқин премера “Гангстерленд” сериали бўлади. Бу —Том Ҳарди, Ҳелен Миррен ва Пирс Броснан бош ролларни ижро этган жиноий драма. Сюжетга кўра, Лондондаги жиноятчи босслар — Ҳарриганлар қудратли империя тепасида туради. Уларнинг янги рақиби пайдо бўлади, у ҳокимият учун ҳамма нарсага тайёр. Ҳарриганлар ҳар қандай хавфни бартараф этадиган содиқ ва шафқатсиз иш битирувчиси Гарри да Соузага мурожаат қилишади. Бироқ у мураккаб танлов олдида қолади: оиласига содиқ қолишми ёки ўз йўлидан бориш.
“Бизлардан биримиз”
“Бизлардан биримиз” сериалининг иккинчи мавсуми премераси 13 апрелга мўлжалланган. 2023 йилда Педро Паскал ва Белла Ремзи бош ролларда ижро этган ушбу пост-апокалиптик драма катта шов-шувга сабаб бўлди. Иккинчи мавсум воқеалари биринчи қисмда кўрсатилган ҳодисалардан беш йил ўтгач содир бўлади. Сценарий компьютер ўйинининг давомига асосланган. Элли ва Жоэл Томмининг жамоасида яшайди. Улар сирли нотаниш одамларнинг пайдо бўлганини билиб қолишади ва Элли дўсти Дина билан бирга уларни излашга йўл олади.
“Киллербот”
Май ойи ўрталарида Apple TV+ стриминг платформасида “Киллербот” номли фантастик жангари фильмининг премераси бўлиб ўтади. Унда бош роллардан бирини Александр Скарсгард ижро этади. Узоқ келажакда андроид-қўриқчилар инсон учун космик экспедицияларда ажралмас ҳамроҳга айланган. Бироқ ўзининг бошқарув модулини бузиб кирган андроидлардан бири вазифаларни бажаришда эркин фикрлаш қобилиятини яширади. У ички кечинмаларга бой бўлиб, сериаллар томоша қилишни ёқтиради ва тобора инсонларга ўхшаб боради.
“Киностудия”
26 март куни “Киностудия” сериали экранларга чиқади. Метт Ремик қийин даврни бошдан кечираётган Cонтинентал Studios кинокомпаниясининг раҳбари. У кинога муккасидан кетган, аммо ҳар лаҳзада карьераси барбод бўлиши мумкинлигидан хавотирланади. Қаҳрамон бир дақиқа ҳам буюк киноасарлар яратиш пойгасидан четда қолмайди. Фильмда Сет Роген, Зак Эфрон, Шарлиз Терон, Мартин Скорсезе ва бошқа кўплаб машҳурлар иштирок этган.
“Қизил дарё”
Яқинда Amanda Сайфред бош ролни ижро этган “Қизил дарё” номли драматик триллер экранларга чиқди. Филаделфиянинг нотинч туманларидан бирида икки опа-сингил яшайди. Бироқ кунларнинг бирида уларнинг ҳаёти бутунлай қарама-қаршига айланади. Кейси ёмон одатларга мубтало бўлиб, кўчада яшай бошлайди. Микки эса полициячи сифатида ўша кўчаларда патрул хизматини ўтайди. Кутилмаганда Кейси ғойиб бўлади ва опаси ўз терговини бошлашга мажбур бўлади.
“Резиденсия”
Бу ҳафта, 20 март куни “Резиденсия” номли детектив драма эфирга узатилади. Ушбу мини-сериал америкалик журналист ва ёзувчи Кейт Андерсен Брауэрнинг “Резиденсия: Оқ уйнинг яширин ҳаёти” китоби асосида яратилган. Сюжетга кўра, расмий давлат зиёфати пайтида қотиллик содир бўлади. Жиноятчини фош қилиш учун АҚШ президенти қароргоҳига ғалати хусусиятларга эга аёл — детектив Корделия Капп ташриф буюради. У барча меҳмон ва ходимлардан шубҳаланади.
“Сен”
Апрель ойи охирида Netflixъда “Сен” сериали чиқади. Ушбу жиноий мелодраманинг мухлислари кўп, чунки у 2018 йилдан бери давом этмоқда ва бу бешинчи якуний мавсум бўлади. Лойиҳада бош ролни Пенн Баджли ижро этади. Янги қисм сюжетига кўра, Жо Голдберг ўзининг бахтли ва мукаммал ҳаётидан завқланиш учун Нью Йоркка қайтади. Аммо тўсатдан у ўтмиш шарпалари ва ўзининг қора истаклари туфайли хавф остида қолади. Сериал асосида ёзувчи Керолайн Кеппеснинг бир қатор романлари ётади.
Изоҳ (0)