Бразилия деганда биринчи бўлиб нима хаёлга келади? Сериаллар, қуёш, табассумли одамлар, футбол. Ва, албатта, карнавал ва ўзига хос урф-одатлар ва анъаналар. Қуйида бу ҳақда батафсил тўхталамиз.
Таомлар
- Бразилияликлар асосан гуруч, дуккакли маҳсулотлар ва уларнинг турли хил бирикмаларини истеъмол қилади.
- Одатдаги тушлик мана шундай кўринишда бўлади.
- Бразилияга келиб, албатта чурраско еб кўриш керак. Уни кабобнинг аналоги деса ҳам бўлади.
- Бразилия ресторанларини шундай тасвирлашади: “Хизмат кўрсатиш пайтида официантлар столингизга бир метр узунликдаги сихда (“эспето” деб аталади) мол ва товуқ гўштининг турли хилларини олиб келишади. Буларнинг барчаси иссиқ, ҳозиргина грилда пиширилган бўлади. Улар тўйиб овқатланмагунингизча кичик бўлаклар ёки порция ларни узатиб туришади”.
Ширинхўрларга кокосли конфетларни татиб кўришни тавсия этамиз. Бу ширинлик “кокада” деб аталади. Уни тайёрлаш учун кокос қириндиси, қуюлтирилган сут ва эритилган шакар ёғда қовурилади.
Карнавал
- Бразилия карнавали Португалия ва Африка маданиятларининг туташган жойида вужудга келган. Биринчи карнавал 1723 йилга тўғри келади.
- Қирол Момо — Риодаги карнавални очиб берадиган афсонавий мавжудот. Одатда уни баланд бўйли машҳур шахс ижро этади. Қирол Момо ишора бермагунча байрам бошланмайди.
- Карнавалнинг қироли бўлганидан кейин албатта қироличаси ҳам бўлиши керак. Уни ҳар йили сайлаб оладилар. Қиролича ўзининг гўзаллиги ва энг муҳими, самба рақсини маҳорат билан ижро эта олиши билан танилган.
- Кўпчилик карнавалда қатнашиш завқли эканлигини эшитган, аммо унинг нақадар қиммат эканлигини камдан-кам одам тасаввур қила олади. Айрим самба мактаблари либослар ва тайёргарлик учун 4 миллион доллардан ортиқ маблағ сарфлайди.
- Карнавал 2 ҳафта, баъзи шаҳарларда эса бир ой давом этади. Унда нафақат профессионал раққослар, балки ҳар ким ясаниб, хурсандчилик қилиши мумкин.
Тўй маросимлари
- Бразилиялик жуфтликлар учун тўй ҳаётларидаги энг муҳим кун саналади. Кўпинча тўйга икки юз ва ундан ортиқ меҳмон таклиф этилади, бу эса катта харажатларни талаб қилади. Энг кўп маблағ таом, ичимлик ва тўй тортига сарфланади.
- Тўйда дастурхонга деярли овқат қўйилмайди. Бунинг ўрнига меҳмонлар ҳашаматли швед столидаги таомларни ўзлари танлаб олади.
- Кўпчилик бразилияликлар тортнинг биринчи бўлагини келин ейиши лозимлигига ишонишади. Бу эр-хотиннинг фарзандли бўлишини кафолатлайди деб ҳисобланади. Бу лаҳзанинг сурати Бразилия оилаларининг ҳар бир тўй альбомида албатта мавжуд бўлади.
- Турмушга чиқмаган қизларнинг оила қуришига ёрдам бермоқчи бўлган келин тўй либосининг этагига дугоналарининг исмларини тикиб қўяди.
- Асал ойига пул йиғиш учун куёв бўйинбоғидан бўлаклар кесиб, меҳмонларга совға қилади, бунинг эвазига эса пул олади.
Янги йил
- Янги йил арафасида Бразилияда кўплаб одамлар соҳилга бориб, ярим тунда океанга сакрайди. Бу ерда етти тўлқинни тутиш омад келтиради деб ҳисобланади. Ҳар бир тўлқинга битта тилак тилаш мумкин.
- Янги йил кечаси ҳамма оқ кийим кияди. Аммо ички кийим рангли бўлиши шарт. Ҳар бир рангнинг ўз маъноси бор. Масалан, бразилиялик аёллар карьерада муваффақиятга эришиш учун тўқ сариқ, севгисини учратиш истагида бўлганлар пушти, соғлиқ учун эса яшил рангли ички кийим кийишади.
- Янги йил байрамида кўплаб бразилияликлар омад келтириши учун чўнтакларида дафна барги олиб юришади.
Соҳил
- Бразилия — денгиз ва қуёш мамлакати. Пляжга ёлғиз келсангиз, ҳатто биринчи марта кўраётган бўлсангиз ҳам, ёнингиздаги одамдан нарсаларингизга қараб туришни сўраш одат тусига кирган.
- Агар одамлар қарсак чалса — бу ёмон аломат. Бу бола йўқолганини англатади. Шунинг учун пляжда қарсак овозини эшитган ҳар бир киши, муаммога эътиборни тортиш учун қарсак чала бошлайди.
Изоҳ (0)