“Дарё” репортажи: “Чегара пости очилишини 15 йил кутдик”

Наманганда Қирғизистоннинг Жалолобод вилояти билан боғловчи “Учқўрғон” чегара божхона пости қайта очилди. Бу ҳақда “Дарё” мухбири Азизбек Абдувалиев хабар бермоқда.

Ушбу чегара постида 2010 йилда транспорт воситаларининг ҳаракатланиши тўхтатилган, 2016 йилда эса бутунлай ёпилган эди.

Икки давлат раҳбарларининг саъй-ҳаракатлари натижасида Ўзбекистоннинг “Учқўрғон” ва Қирғизистоннинг “Кенсай” ўтказиш пунктлари фаолияти қайта тикланиши белгилаб олинди.

Жорий йил март ойида ушбу ҳудудда қурилиш ишлари бошланиб, 75 миллиард сўм маблағ сарфланди ва қисқа вақт давомида икки мамлакат учун бир хил кўринишдаги чегара божхона постлари қурилди.

“Бу воқеани наманганликлар учун чинакам байрам, Мустақиллик айёмига муносиб туҳфа десак бўлади. Чунки ушбу чегара постининг очилишини қарийб 15 йил кутдик. Унинг қайта тикланиши вилоят иқтисодиётига жуда катта туртки беради. Наманганда ишлаб чиқарилаётган текстиль, қурилиш ва озиқ-овқат маҳсулотларига қўшниларимизда қизиқиш кучли, ўз навбатида, Қирғизистоннинг сифатли кўмири бозорларимизда харидоргир. Қолаверса, чегара пости атрофида келгусида 100 гектар майдонда логистика маркази қуриш лойиҳаси ишлаб чиқилган, бу эса кўплаб янги иш ўринлари пайдо бўлишини англатади”, дейди Наманган вилояти ҳокими Шавкат Абдураззоқов.

Вилоят божхона бошқармаси мутасаддиларининг билдиришича, чегара пости очилгандан сўнг бир кунда ўртача 10 000 нафарга яқин фуқаро, 500 дан ортиқ юк ҳамда 300 дан зиёд енгил транспорт воситалари ҳаракати кутилмоқда.

Чегара постларининг очилиш маросимда Қирғизистон Республикаси Вазирлар Маҳкамаси раис ўринбосари Боқит Тўрабоев ҳамда Ўзбекистон Республикаси бош вазири ўринбосари Очилбой Раматов иштирок этди. Рамзий ленталар қирқилиб, ушбу тадбирдан эсдалик сифатида дарахт кўчатлари экилди.