10 августдан бошлаб Қирғизистон ва Ўзбекистон чегарасидаги “Дўстлик” назорат ўтиш пункти орқали ўтувчи йўловчи ва транспортлар оқими ошди. Қирғизистон Миллий хавфсизлик давлат қўмитаси Чегара хизмати бунинг сабабини тушунтирди.
![](/static/2024/08/28/photo_2024-08-28_14-40-32-Er8jPOmf.jpg)
Маълум қилинишича, ушбу назорат-ўтказиш пунктидан кунига 18-26 минг киши ўтмоқда. Бироқ чегарани узлуксиз назорат қилиш шароитида, мазкур пунктнинг ўтказиш имконияти суткасига 16 минг 400 кишини ташкил этади.
Қирғизистон—Ўзбекистон давлат чегарасини “Дўстлик” назорат-ўтказиш пункти орқали кесиб ўтаётган фуқаролар ва транспорт воситалари сонининг сезиларли даражада ортиши навбатлар ва ўтиш пунктида енгил транспорт воситаларининг тўпланишига сабаб бўлмоқда. Бу Ўш вилоятидаги бозорлар фаолияти (бозорларда улгуржи савдо кунлари — сешанба ва шанба), талабаларнинг ўқиш жойларига етиб келиши, давом этаётган туризм мавсуми ва мавсумий ишлар билан боғлиқдир, дейилади хабарда.
Таъкидланишича, назорат-ўтказиш пунктида давлат чегарасини кесиб ўтаётган фуқаролар учун қулай шароитлар яратилган бўлиб, уларни янада яхшилаш бўйича режа асосида ишлар олиб борилмоқда.
Қирғизистон—Ўзбекистон давлат чегарасида жойлашган назорат-ўтказиш пунктлари одатдаги тартибда ишламоқда. Ҳозирги вақтда ўтиш пунктида 33 та паспорт назорати кабинаси фаолият кўрсатмоқда.
28 август ҳолатига кўра, Қирғизистон—Ўзбекистон давлат чегарасининг қуйидаги назорат-ўтказиш пунктлари фаолият кўрсатмоқда:
Жалолобод вилоятида: “Маданият”, “Баймоқ”;
Ўш вилоятида: “Дўстлик”;
Боткен вилоятида: “Қизил-Қия”, “Қадамжой”, “Қайтпас”, “Оқ-Қия”, “Ўтукчи”, “Чашма”.
Қирғизистон Миллий хавфсизлик давлат қўмитасининг Чегара хизмати фуқароларга сафарларини ва йўл маршрутларини олдиндан режалаштиришни тавсия қилади.
Изоҳ (0)