Мусиқий билимга эга бўлмаган, клиплари ҳеч қачон телеканалларда кўрсатилмаган юлдуз. Жалолиддин Аҳмадалиевнинг илк яккахон концертидан репортаж (фото, видео)

«Менда қолмади дил», «Ёр биздан кетди» ва «Хавотирдаман» қўшиқлари билан тингловчилар кўнглидан жой олган хонанда Жалолиддин Аҳмадалиев 7–8 июнь кунлари «Халқлар дўстлиги» санъат саройида илк яккахон концерт дастурини тақдим этди. «Дарё» мухбирлари концертга ташриф буюриб, видео ва фоторепортаж тайёрлашди.

Жалолиддин Аҳмадалиев ким? У ижодни қачондан бошлади? Бу савол кўпчиликни ўйлантириши аниқ. Чунки  қўшиқлари халқ тилига тушган бўлишига қарамай, у ҳақидаги маълумотлар жуда оз. Шу боис репортажни бошлашдан аввал хонанда ҳақида бироз маълумот бериб ўтсак.

Жалолиддин Аҳмадалиев 1992 йил 12 сентябрь куни Фарғона вилоятининг Данғара туманида дунёга келган. Жалолиддин Аҳмадалиев «Она, сени унутганим рост», «Ёр биздан кетди», «Менда қолмади дил», «Тупроқдан бўлгансан, тупроқ бўласан», «Эҳ жўралар», «Хавотирдаман», «Дадамнинг соясида» каби қўшиқлари билан машҳурликка эришган. Аммо хонанда мусиқа бўйича таҳсил олмаган. Оиласидаги моддий қийинчиликлар сабаб 18 ёшида Россияга ишлагани кетган. Ундан сўнг Тошкент ва Фарғонада сантехник уста ва косиб бўлиб ишлаган. Оилали, Аҳмадали исмли ўғли бор.

Концерт бошланишидан аввал хонанда отаси ва амакисидан дуо олди.

Одатда хонандалар камида 4-5 йил ижод қилгач, яккахон концерт дастурларини ўтказишади. Аммо Жалолиддин Аҳмадалиев бу борада рекорд натижани қайд этди. Чунки унинг илк қўшиғи 2021 йилнинг 16 июнь санасида YouTube тармоғига жойланганди. Норасмий маълумотларга кўра, унинг қўшиқлари  интернет тармоғидан энг кўп изланадиган ўзбек тароналари ҳисобланади. Масалан, саккиз ой аввал YouTube тармоғига жойланган «Ёр биздан кетди» клипи 34 миллион,   «Соғиндим» қўшиғи 25 миллион маротаба томоша қилинган.

Ҳеч бир дастур ўз-ўзидан саҳна юзини кўрмайди. Унинг ортида оғир меҳнат, асаббузарлик ва кўнгилсизликлар ҳам бўлиб туради. Жалолиддин Аҳмадалиев ҳам концерт олди бироз асабийлашди.

Концертда «Браво» кулги жамоасининг аъзолари Умид Умаров ва Шаҳло Зоирова қизиқчи Жамшид Норматов билан бошловчилик қилишди.

Шу кунгача хонанданинг 8 та қўшиғига клип суратга олинган. Аммо уларнинг ҳеч бири телевидениеда намойиш этилмаган.

Халқ хизматларида фақат жонли куйлайдиган хонанданинг илк яккахон концерти ҳам тўлиқ жонли ижрода ўтди. У ҳаяжонланиши, созандалари ёки саҳна акустикасининг нотўғри эканлигини баҳона қилмай, жонли ижрода концерт беришни уддалади.

Концерт икки блокдан иборат бўлиб, унда жами 20 та қўшиқ ижро этилди.

Мазкур концерт бошқа дастурлардан фарқли равишда режиссёр, гримёр, раққоса ва бек-вокал ижрочиларисиз ўтди. Одатда хонандалар концертларида раққосалар қўшиққа мос рақсларга тушишини исташади. Албатта, бу концертнинг томошабоплигини оширади. Аммо  ёш хонанда Жалолиддин Аҳмадалиевнинг концерти буларсиз ҳам файзли ўтди.

Шаҳло Зоирова хонанда Жалолиддин Аҳмадалиевнинг тарбияли эканлигини қайта ва қайта эътироф этди. Ҳақиқатан ҳам хонанда ногирон мухлисалари олдига бориб, гулларини қабул қилди. Бошқа мухлислар олиб келган гулдасталарнинг бирортасини ерга қўймади.

Жалолиддин Аҳмадалиевнинг концерти учун нафақат водийдан, балки Қашқадарё ва Сурхондарёдан ҳам мухлислар ташриф буюришди. Энг қизиғи, ёш хонанданинг концерт чипталари кассада қолмагани боис  «қора бозор»да икки баробар қимматга сотилди.

Хонанданинг онаси ўғли учун катта гулдаста олиб келди.

Хонанда концерт либоси ҳам оддий бўлишини истаган кўринади. У бошқа ҳамкасблари сингари қиммат бренд костюм-шимда саҳнага чиқмади.

«Она, сени унутганим» рост қўшиғини йиғлаб ижро этди.

Бундан ташқари, хонанда халқ артистлари ва устоз санъаткорлар қўшиқларидан ажойиб попурри ижро этди. Мухлислар қўшиққа мириқиб рақсга тушишди.

Дастур сўнгида аксарият мухлислар зални тарк этишмади. Уларнинг назарида, концерт оз бўлгандек эди.

— Жалолиддиннинг қўшиқларини кунига камида бир марта эшитаман. Чунки унинг ижоди ўзига хос. Концертига таклиф этганди, шунча ишимни ташлаб, бошловчилик қилишга рози бўлдим, — дейди «Браво» кулги жамоаси аъзоси Шаҳло Зоирова.

Хонанда клипларининг режиссёри Акромбек Нуруллаев актёр Санжар Холмуродов билан. Бу актёр Жалолиддин Аҳмадалиевнинг «Жўралар» клипида суратга тушган.