Йилига 120 миллион сўм: Нафақат санъатдан, балки деҳқончиликдан ҳам катта маблағ топаётган ўзбек шоу-бизнеси вакиллари (фото, видео)

«Йигит кишига етмиш ҳунар ҳам оз», дейишади. Ўзбекистонлик санъаткорлар орасида ҳам ўзини турли соҳаларда синаб кўраётган ҳамда меҳнати эвазига мўмай даромад топаётганлар талайгина. Қуйида аксарият машҳурларнинг кўпчиликка маълум бўлган фаолият турлари ҳақида сўз боради.

«Браво» кулги жамоаси аъзоси Умид Умаров деҳқончилик билан шуғулланади 

— Дадам раҳматли ўқитувчи бўлган бўлса ҳам деҳқончилик ва чорвачиликка қизиқарди. Бирор марта давлатдан ёки замондан нолиганини эшитмаганман. Ишдан кейин шоли экиб, бизни ҳам деҳқончиликка қизиқтирган. Аввалдан хонадонимизда бир неча бош қорамол бўлган. Шу боис моддий жиҳатдан ҳам қийналмаганмиз. Дастурхонимиз ҳамиша тўкис бўлган.Дадамнинг ишини давом эттириб, Фарғона вилоятидаги Данғара туманида деҳқончилик билан шуғулланаман. 60 сотих ер майдоним, 40 сотих иссиқхонам бор. Ҳар мавсумда турли экинларни экамиз. Буғдой, мош, маккажўхори, ҳандалак, қовун, тарвуз, ловия, картошка саримсоқпиёз, хуллас экинларимизнинг тури кўп. Иссихонага эса асосан помидор, бодринг ва булғор қалампири экилади. Боғимиздан эса сара узум, шафтоли ва бодом мевалари халққа етказилади.

Деҳқончиликдан топадиган йиллик даромадим ёмон эмас. Уруғ, ўғит, сув, ер ижараси, ишчи харажати ва техникаларга сарфланган пулдан кейин камида 120 миллион даромад топаман. Тўғри, баъзи йиллари зарар кўрган пайтларим ҳам бўлган. Чунки ҳар соҳада бўлганидек, деҳқончилик ва боғдорчиликнинг ҳам ўзига яраша сирлари бор, — дейди «Браво» кулги жамоаси аъзоси Умид Умаров.

Абдужалил Қўқоновнинг 40 сотихли боғи бор

— Боғдорчилик билан 20 йилдан буён шуғулланаман. Уйимиз 45 сотих, шундан 40 сотихини катта боғ ташкил қилади. Уйимизга асосан узун экканмиз ва уни маҳалладош укалар ёрдамида парваришлаймиз. Шу кунгача 2 гектар ер майдонида ташкил этилган боғга ҳам эгалик қилардим. Катта боғимизда узум, шафтоли, гилос ва лимон меваларини ўстирамиз. Бу йил яна бир гектар ер майдонига шартнома имзоладик. У ерда ҳам узум етиштириш ниятимиз бор. Деҳқончилик ва боғдорчиликда даромад катта. Фақат эътиборли бўлиш ва меҳнатдан қочмаслик керак.  Боғда фақат ўзим ишлайман десам хато бўлади. Маҳалладош боғбонларни кунбай асосида ишга оламиз, — дейди хонанда Абдужалил Қўқонов.

Валижон Шамсиев ҳам боғбон

— Деҳқончилик билан шуғулланаётганимга анча йил бўлган. Илгари 60 гектар ер майдоним бор эди, шундан 7 гектарига боғ ташкил қилгандик. Аммо бу соҳанинг ҳам қийинчилиги бор, шу боис уни топширворишимизга тўғри келди. Ҳозир фақатгина Олтиариқда 40 сотихлик боғим бор. У ерда асосан ўрик ва шафтоли етиштирилади. Тошкентдаги уйим атрофига эса узум ва шафтоли экканмиз. Уйим атрофидаги боғга ўзим қарайман, катта боғнинг эса ўз боғбонлари бор, — дейди қизиқчи Валижон Шамсиев.

Отабек Муҳаммадзоҳид: «Боғимдан фақат ўз эҳтиёжим учун фойдаланаман»

— Очиғини айтсам, деҳқончилик ва боғдорчиликка қизиқмайман. Аммо шаҳардан ташқарида боғ ташкил қилганмиз. Чунки ижодкор аҳли ҳамиша сокин, баҳаво жойга бориб, ижод қилишни истайди. Шу мақсадда шаҳардан чеккароқда ер олиб, 5-6 тупдан турли мевалар ва бодом кўчатларини эктирганман. Ёз кунлари у ерга бориб, ҳордиқ чиқарамиз. Табиат қўйнида яратилган ижод маҳсули ҳам гўзал бўлади. Мисол учун «Майли телба денглар» қўшиғи ҳам айнан ўша боғда яратилган. Дарахтларга боғбон йигит қарайди, у ердан катта даромад олмаймиз. Аммо ёзда мазали мевалар дастурхонимиздан аримайди, — дейди хонанда Отабек Муҳаммадзоҳид.

Абдурашид Йўлдошев: «Болалалигимиздан бу ишларни эркак киши билиши керак, деб улғайганмиз»

— Ҳақиқатан ҳам оиламизнинг катта боғи бор, аммо бу иш билан асосан Абдувоҳид акам шуғулланади. Отам ҳам чорвачилик, деҳқончилик ва боғбончиликка қизиққан. Шу боис, болалалигимиздан бу ишларни эркак киши билиши керак, деб улғайганмиз. Боғимизда олма, шафтоли ва ғилос мевалари бор. Мавсумга қараб, бозордаги талабгирлигига қараб сабзавотлар экилади. Бу йил асосан бодринг ва помидор экишди. Очиғини айтаман, илгари экинларга онда-сонда бўлса ҳам қўлим тегиб турарди. Ҳозир ишларим кўплигидан «Ҳай баракалладан» нарига ўтолмай қолганман, — дейди хонанда Абдурашид Йўлдошев.

Раҳмонали Суропов 10 йилдан буён деҳқон

— Деҳқончилик билан 10 йилдан буён мунтазам шуғулланаман. Ҳар йили деярли зарарига ишлайман. «Бўлди, энди деҳқончилик қилмайман», дейман-у, аммо қизиқиш сабаб баҳорда яна ишни бошлаб юбораман. Баҳорда 25 сотих иссиқхонага бодринг экдим. Ҳозир ёмон бўлмади, аммо бодринглар арзон пайтда бозорга чиқди. Ҳозир эса 1 гектар ерга помидор экканман. Ҳозир ҳам Ўртасаройдаги далада бери келолмаяпман. Сабаби помидорга қурт тушиб кетяпти. Энг кучли дори ҳам бир ҳафтага етмай таъсирини йўқотяпти. Одамлар кимёвий моддаларни кўп ишлатасизлар деб нолишади. Тўғри, аммо деҳқонларга ҳам осон эмас. Биттагина пашша ахлатидан пайдо бўлган қурт аввалига помидор баргларини, ундан кейин мевасини қурутяпти, — дейди комик актёр Раҳмонали Суропов.

Мавзуга доир:

• Шукурулло Исроилов — «морг»да, Севара Назархон — «Ипподром»да. Машҳур бўлишидан аввал ўзини турли соҳаларда синаб кўрган ўзбекистонлик санъаткорлар (видео)
• «Зарарига ишлаётган бўлса ҳам корхонамни ёпа олмайман». Юлдуз Усмонова президент билан гапи бир жойдан чиққани ва янги бизнес бошлаётгани ҳақида (видео)
• Чумчуқ сўйса ҳам, қассоб сўйсин. Тадбиркорликни уддалай олмаган ўзбек шоу-бизнеси вакиллари